® عالم سمسم ®

إرحلوا.. فلا وطن للعجائز

2012-01-16T00:23:00.000-08:00

نعم أقصدك أنت، وأقصدك أنتي.. وأقصدكم جميعاً أيها العجائز في بلدنا مصر.. ولا أستثني منكم أحدا، حتى أبي وأمي..

الغني منكم والفقير.. القوي منكم والضعيف.. كنتم خير تماثيل في أسوأ عصور عاشتها البشرية..

فأنتم المشكلة الحقيقية التي نعيشها.. وأنتم تلك الظروف العصيبة التي تمر بها البلاد..

أيها العجائز.. أخاطبكم وأنا كلي أمل وتفاؤل في الحياة على أرض هذه البلاد.. رغم كل مجهوداتكم لإعادتنا لحياة العبودية التي عشتموها.. أخاطبكم بكل صراحة.. محاولاً التعبير عن مشاعر جيل بأكمله.. حاولتوا تدميره مرات ومرات عديدة ولم تفلحوا ..

فلترحلوا..

من كافة مناصبكم النظرية والعملية والحياتية أيضاً.. إما أن تعيشوا في صمت.. أو لترحلوا في هدوء..

فهل مشكلتنا أنكم ولدتم في عصر لا يقدر إلا العجائز؟؟ فهل نتحمل صمتكم على عصور الظلمات التي مرت بها بلادنا، بفضلكم على مدار عشرات السنين؟؟

فهل مشكلتنا إنكم طفحتوا الدم، وشابت شعوركم عشان تلاقوا وظيفة.. أو تعملوا قرشين وتتجوزوا، أو تبقوا صفوة، أو إعلاميين ومتحدثين بإسم الوطن.. أو حتى رجال مجتمع؟؟

فهل مطلوب منا أن نسير في تلك الطرق العقيمة، الذليلة التي سرتم فيها من قبل لكي تصلوا لما تعتقدون إنكم وصلتوا إليه من مجد، وتحقيق للذات؟؟

ألم تخجلوا من أنفسكم بعد مظاهرات يناير التي تحولت لثورة، بفضلنا نحن.. وشهدائنا البواسل؟؟ ألم نثير أي مشاعر أو أحاسيس بداخلكم؟؟

كيف لنا أن نثق فيكم.. ومنذ الأيام الأولى للثورة وأنتم ضدنا.. بل ومنذ أن كنا في أرحامكم كنتم ضدنا.. قبل أن تكونوا ضد أنفسكم..

كنتم ضدنا وضد أنفسكم عندما أعتقدتم أن لقمة العيش أهم من الكرامة..

ألم تخجلون من أنفسكم؟؟ بعد كل هذا تريدون أن تتحدثوا بإسمنا؟؟ وبكل فجاجة وبجاحة.. تسيرون في طرق كثيرة، ومعقدة لإختيار أصغركم سناً ( والذي هو في العادة يفوق عمره ال 50 عاماً ) لكي يمثلنا ويعبر عنا؟؟

لم أسألكم السؤال التقليدي: كنتوا فين من 30 سنة، فأعتقد إنكم سمعتموه من قبل، ولا شك أنكم الآن جاهزون بأجابات ومبررات كثيرة على هذا السؤال.. ف التبريرات كانت لعبتكم وهمكم الأول.. الذي كان يساعدكم في كثير من الأحيان على الإستمرار في تلك الحياة القذرة، التي عشتموها.. ولا أعتذر للغالبية العظمى منكم، التي لا تقل عنكم خوف.. والذين تحولوا إلى مدمنين لتلك القذارة.. كالذي تعلم الشذوذ وأخذ يعاند في نفسه ويعاند.. حتى أصبحت حرفته الشذوذ.. وأصبحنا نحن الشواذ أمامه..

فكلكم كان ضدنا.. حتى الذي خرج وهتف معنا.. كان ضدنا، نعم كان ضدنا عندما أتى معنا دون أن يترك خوفه ( الذي عاشره طوال عمره ) في بيته.. وأتى به للميدان ليلتحق بالصفوف الخلفية ( وخلف الخلفية ).. ويترك – أبناءه – من خيره شباب الوطن في الصفوف الأولى أمام رصاص الأمن الغادر..

بل وتركتم خوفكم يشجعكم على التفاوض معنا أثناء المعركة، بعد أحد خطابات المخلوع العاطفية..

لم تتعاطفوا مع مبارك فأنتم مفتقدين لتلك المشاعر.. بل هو الخوف، الخوف من المجهول.. هل تعلمون الخوف؟؟ كنتم تخافون علينا؟؟ بل كنتم تخافون على أنفسكم، كنتم صامتون حتى تقوموا بتربيتنا؟؟ وهل تعتقدون إننا تربينا على أيديكم؟؟ وعلى ماذا كنتم تعتقدون إنكم ربيتمونا؟؟ على الخوف؟ منكم؟؟ أم من النظام؟؟ أم عليكم؟؟ وندور سوياً في تلك الحلقة المغلقة، خائفون علينا في الصغر، ونحن الآن يجب أن نخاف عليكم في الكبر؟؟

نخاف ونرحل من الميدان؟؟ بعد كل تلك التضحيات، نخاف من ماذا؟؟

من المجهول.. هل تعلموا ما هو المجهول؟؟ عرفونا به لو سمحتم، فهذا " المجهول " ليس له وجود في قاموس حياتنا..

وأنتهت الثورة ( فقط من وجهة نظركم أيضاً ) ويعود فيكم من يعود إلى بيته.. فيشكر في الشباب الذي أعاد له كرامته وكأن كرامته أغتصبت منه، دون أن يبيعها مرات ومرات عديدة.. بكل أنواع الوسائل.. حتى بأنفاس قلبه الذي كان يشهق الخوف.. طوال سنوات نظام فاسد !!

وليعود الصفوة.. لا إلى بيتهم ( خاجلين من أنفسهم ) .. بل لمنابرهم القديمة.. من إعلام وتليفزيون وصحافة وخلافه.. يتحدثون عن الموت الذي كان حاضراً في تلك اللحظات العصيبة التي كانت تمر بها البلاد.. ولا يتحدثون عن الموت الذي كانوا يعيشون فيه ويعيش فيهم..

لا ينتبهون أنهم نفسهم هم اللحظات العصيبة – الطويلة – التي كانت تمر بها البلاد..

فلترحلوا في صمت واتركونا..

فإنتم شركاء في هذا النظام.. ومعظمكم إن لم يملؤه الحقد والغيره من ما تسمونهم " أولادكم " ف إنه مازال يعيش بداخله الجبن والخوف من المجهول – أي مجهول – حتى وإن كان هذا المجهول غير موجود إلا في خيالكم أنتم.. وهل كنتم تعيشون في واقع من الأساس؟؟ حتى تتحدثون بريبه عن المجهول؟؟

إرحلوا.. ليس لكي نتذكركم بالخير.. عندما تأتي سيرتكم.. بل لكي لا نتذكركم بالشر !!..

إرحلوا لكي لا نتذكركم أصلاً..

إرحلوا أيها العجائز..

أتعلمون أنكم قبل أن تكونوا عجائز الأعمار.. ف أنتم عجائز في أشياء كثيرة يعلمها بعضكم ولا يعلمها آخرون ( وليس غريباً أن يصبح الشيء الوحيد الذي يذكركم بعجزكم قد عجز هو أيضاً )

ماحدش ح يحس بالشباب اللي راح.. غير الشباب اللي زيه.. وماحدش ح يجيب حق عمرهم اللي راح.. غير اللي كانوا معاهم على نفس خط المسافة من الموت.. مش العجائز اللي عاشوا عمرهم يدافعوا عن بقائهم على حساب كرامتهم..

إرحلوا.. فلا وطن للعجائز..

وأخيراً، وبكل صدق..

يا نجيب حقهم، يا نموت زيهم !

محاكمة عسكرية.. أم المدنية

2011-05-31T15:41:00.000-07:00

والله ح يبهدلونا

كانت تلك أولى كلماتي مع أصدقائي وأبناء عائلتي فور خروجي من أحد معتقلات الجيش المصري المسماه بالسجن الحربي بمنطقة الهايكستب بطريق السويس.. ليلة 11 فبراير 2011

- الليلة التي تنحى فيها المخلوع.. او بمعنى ادق.. أُرغم على التنحي.. من قبل الجيش بقى.. من قبل المتظاهرين

انا كنت جوه آخر أسبوع ومش متابع التطورات.. كانت كل الناس مبسوطة بإن المجلس العسكري ح يحكم البلد..

- التدوينة دي بمناسبة الدعوة التي تلقيتها.. لكتابة تدوينة ( عن المحاكمات العسكرية ) يوم 1 يونيو 2011

- أنا مش ح انتقد المجلس العسكري ولا ح أرمي تهم على حد.. لأني شايف ان اي شراكة بين 2 ممكن يحصل فيها مشاكل.. فما بالك شراكة بين قوتين زي دول

المجلس العسكري.. والشعب

- اخترت احكي تجربتي بتفاصيلها.. لأني شايف انها كفيلة تعرفنا يعني ايه محاكمة عسكرية، والمدني اما بيدخل سجن عسكري بيتعمل فيه ايه.. ح احكي تفاصيل اعتقالي وقضائي 5 أيام في سجون الجيش وعلاقتي بالقوات المسلحة في تلك الأثناء وحضراتكم تحكموا..

- احب أؤكد ان المجلس العسكري هو اللي بيفشى الأسرار العسكرية.. وهو اللي انتهك حرمة الجيش.. وحرمة المناطق العسكرية.. اما حقق معانا ف النيابات العسكرية وحبسنا ف سجونها.. ولو فيه حساب.. يبقى المجلس العسكري هو اللي المفروض يتحاسب مش احنا..

- احب كمان اعتذر لحضرة الضابط اللي قالنا واحنا خارجين:

روّحوا لأمهاتهم خلوهم يطبخولكم أكله حلوة.. يدبحولكم بطه.. واقعدوا كده استرخوا ف بيتكم كام يوم ولا اسبوع.. واوعوا تقولوا لحد انتوا كنتوا فين..؟ مش من مصلحتكم تحكوا اي حاجه شفتوها هنا..

1 - مساء يوم الأحد الموافق 6 - 2 – 2011

وانا خارج من ميدان التحرير وكان معي احد الزملاء..

قررنا ف اليوم ده اننا نخرج من ميدان التحرير ونبات في أي شقة تبعنا تكون قريبة.. ف أول فيصل أو ف الهرم لسه ما قررناش.. قبلها عرفنا زمايل لينا وزميله للزميل اللي كان معايا اننا ح نخرج وانها تستنى مننا تليفون تطمن علينا.. وانا كان المفروض اكلم امي زي ما وعدتها ف اليوم ده قبل مانام..

طلعنا على موقف عبد المنعم رياض وكانت الساعة حوالي 11 مساءاً وقت حظر التجول بدأ.. لكن بخبرتي مع حظر التجول قلت ان حظر التجول لا يطبق فعلياً واننا مادام معانا بطايقنا وف السليم ماحدش ح يقدر يكلمنا.. وقد كان

ف عبد المنعم رياض واحد من الجيش وقفنا قالنا رايحيين فين.. قولناله مروحين.. فيه حاجه؟ ولا نرجع ميدان التحرير؟ قالنا لأ مفيش.. بس خدوا تاكسي ماتمشوش على رجليكوا..

شارع الكورنيش وقتها كان فاضي.. وده كان بسبب الدبابات والعربيات العسكرية الموجودة كل 5 متر..

فين وفين اما جه تاكسي وكان راكب معاه واحد قدام.. والسواق قالنا تعالو ده نازل المنيل واوديكو بعد كده فيصل

بالفعل ركبنا معاه ومشي بينا وكل 100 متر كنا بنقف ونتفتش تفتيش كلي وبتتشاف بطايقنا وتمام.. لغاية ما التاكسي دخل ف شوارع المنيل مش فاكر كان اسم الشارع ايه.. ولاحظنا ان الناس لسه صاحية وقاعدة بره تحمي بيوتها وعمايرها.. واللجان الشعبية شغاله

ولاحظت ان التاكسي ما اتفتش خالص عشان الراكب القدماني كان معروف ف المنطقة وكل ما يعدي على جماعة يشاورلهم.. يقولوا اتفضل يا ميسو

لغاية ما ميسو نزل من التاكسي والسواق كمل لآخر الشارع عشان يلف بينا يروح فيصل وعند الملف كان هناك لجنة شعبية.. وكان معظم اللي واقفين فيها اشكالهم ماتديش غير على بلطجية.. كحال معظم اللجان الشعبية وقتها.. وقف التاكسي وجه واحد اقرع طول بعرض من رجاله المنطقة الواقفين ف اللجنة الشعبية.. وشاف بطايقنا

وأستغرب انه لقى بطاقة واحد فينا إسكندرية وبطاقة واحد تاني مصر الجديدة.. وأننا رايحين فيصل.. وأحنا دلوقتي ف المنيل

قالنا انزلوا فتش الشنطة بتاعتي وطلع منها الكاميرا.. وسألني وهو بيحاول يفتح الكاميرا.. عليها ايه الكاميرا دي؟ مديت ايدي آخد الكاميرا منه عشان ما يبوظهاش وقولتله.. هات اوريك.. قام ضاربني بإيديه ف وشي وطلب من سواق التاكسي انه يمشي.. ونادى بقية زمايله وطلب من سواق التاكسي انه يمشي.. واحنا قولناله ان اصلاً مكنش فيه اي عربيات ف الشارع واضطرينا نركب مع تاكسي بيوصل واحد ف المنيل عشان يرجع بينا فيصل..

الزميل اللي كان معايا سرعان ما قالهم اننا كنا ف التحرير بنصور.. وقام هاتك ياضرب.. بالنبابيت والعصيان ناهيك عن التهويش بالخناجر.. والاصوات تتعالى: ياولاد الوسخة ده انتو ( بتوع التحرير ) ما بتنيمتوناش بقالنا أسبوعين

ماستغربتش كتير عشان ده كان رأي ناس كتيرة من عامة الشعب ف بتوع التحرير.. خصوصاً اللي كانو واقفين لجان شعبية منهم.. مش كل اللجان الشعبية برضو عشان منظلمش حد.. لكن الجهله منهم اللي كانوا مسلمين نفسهم للتليفزيون المصري.. ولأهرام أسامة سرايا.. وبقية المرتزقة من الاعلاميين اللي كانوا فاكرين نفسهم مستقلين

المهم

انا ابتديت اعلي صوتي عشان اسمع الناس اللي نايمة ف المنازل الموجوده ف الشارع. تحسباً أن واحد عاقل يطلع من دول ونعرف نتكلم معاه.. بالفعل جالنا عاقل.. لكن الحقيقة ماطلعش عاقل خالص.. قالنا ماتخافوش وروني بس فيها ايه الكاميرا ولو مفيهاش حاجه ورونوا كارنيهات القناة اللي بتشتغلو فيها واحنا ح ناخد الشرايط ونسيبكوا.. احنا لسه بس من يومين ماسكين مصورين لقناة الحياة.. كلمنا الجيش قالنا خدوا منهم الشرايط وسيبوهم.. بعد ما ورونا كارنيهاتهم طبعاً

يادي المصيبة.. يعني مسكوا ناس وروهم كارنيه القناة ومع ذلك خدوا الشرايط وسابوهم.؟ امال ح يعملوا فينا احنا ايه؟

الزميل اللي كان معايا كان هادي طول الوقت.. وهدوءه ده ماحماهوش من الضرب هو كمان.. ف بعد ما خدونا ف مدخل عماره وكتفونا.. ونزل واحد تاني من سكان العمارة وقالنا ماتخافوش انا ظابط.. المشكلة ان كل واحد من سكان المنطقة يجي يبص علينا ويقولنا ماتخافوش.. انا كنت سرعان ما بمدح فيه واقوله حضرتك اكيد فهمتنا صح؟ ده شكل بلطجية ده؟ اللي يقولي لأ بس شكل اجانب.. وخصوصاً الزميل اللي كان معايا كان طول الوقت ساكت وهادي.. لدرجة ان واحد منهم قام ضربه وقاله.. انت ساكت ليه ياد؟ انت اكيد عامل عامله كبيرة.. طلع اللي ف جيبك يا ابن.. التاني راح رد عليه بسرعة قاله.. ده مش عاوز يتكلم عشان شكله اجنبي وخايف نقفشه من لهجة كلامه

طبعاً كانوا بعتوا جابو ظابط جيش من اقرب نقطة فيها تفتيش للجيش.. كان تقريباً ملازم وكان واضح ان الظابط ده يعرفهم ويعرفوه كويس لانه كان بيناديهم بالإسم..

انا شفت ظابط الجيش.. قلت الحمد لله جانا الفرج.. ح نروح

الظابط دخل علينا واحنا ف قمة الانهيار.. من المصير المظلم.. وأول ما شفته حسيت اني روحي رجعتلي تاني.. وما منعتش نفسي وانا بقوله.. انا اول ما شفت البدلة دي ( اللي لابسها ضابط الجيش ) استريحت.. ياريت حضرتك تاخدنا من هنا واحنا مستعدين للتحقيق والتفتيش زي مانت عاوز

ماكملتش جملتي لقيت ايد بتنزل عليا وخدت أول قلم من أحد البلطجية ف وجود الظابط.. وبتاع الجيش ولا حتى بص ناحية اللي ضربني

طلب من البلطجية انهم يجيبولهم كلابشات بلاستيك.. اللي بيتربط بيها السلك.. وانا كان نصيبي كلابشين عشان كنت بتكلم كتير.. وزميلي الصامت كان نصيبه كلابش واحد.. عشان أجنبي

البلطجية هما اللي كلبوشنا ودخلونا ف عربية ملازم الجيش.. وكانت عربيته الملاكي مش عربية ميري..

ومن مدخل العمارة حتى العربية.. ضرب وشتيمة وبتاع الجيش قاعد يتفرج

ركبنا ف الكرسي الخلفي من العربية واحنا مكلبشين.. وركب جنبي واحد وواحد تاني كان عاوز يركب جنب الزميل.. ولكن الزميل انفرط ف الصراخ وطلب من الضابط بتاع الجيش حمايتنا وحمله المسؤلية.. كان الضابط بيحط الكاميرا بالشرايط ف شنطة العربية وجه على صوت الزميل.. وطلب من اللي قاعد جنبي يمشي وطلب من اللي البلطجي اللي ركب قدام برضو يمشي.. وانه ح يتولى المسؤلية ويسلمنا للشرطة العسكرية.. والناس مصرة انها توصلنا.. قاموا جابو موتوسيكل وعربية ملاكي تاني ومشيوا ورانا لأول الشارع.. لحد بتاع الجيش طلب منهم انهم يروحوا وما يخافوش واننا لو هربنا ح يعمل فينا ويخلي

المهم

بعد ما مشينا من المنطقة المشئومة دي سألنا عمنا الظابط.. هو حضرتك ح تعمل فينا ايه؟

قالنا ما تخافوش انا ح اوديكم اقرب نقطة ف الهرم ح يتحقق معاكو وبعدين يتم اخلاء سبيلكم من هناك.. انا مش عاوز ابهدلكم

وصلنا نقطة الجيش قام الضابط نازل من العربية وطلع الكاميرا.. ولا انكر انه خد الشرايط.. ك نوع من الحماية لينا.. يعني الكاميرا دلوقتي مفيهاش ولا شريط مفيش غير شريط فاضي ف علبة الكاميرا.. المهم انا ماعرفتش ده غير متأخر بعد ما اعترفت اني كنت بصور ف التحرير.. اعترف ليه اصلاً هو التصوير ف التحرير جريمة؟ مش عارف انا عقلي كان فين ساعتها.. كان كل همي اني ارجع التحرير تاني واكمل.. او حتى عالاقل اتصل بأمي اطمنها

نزلنا نقطة الجيش والضابط ف ايده الكاميرا والحاجة.. لقينا مجموعة من البشر حوالي 6 شباب نايمين على بطنهم وعساكر من الجيش نازلين ضرب فيهم.. وأول مادخلنا قالولنا.. ماتخافوش دول بلطجية وتجار مخدرات..

والضابط اللي سلمنا أول مرة وهو بيسلمنا لنقطة الجيش دي قال جملة سمعناها كتير بعد كده: الناس دي شكلها محترمة.. مش زي العيال دول

انا بصراحة اطمنت اول ما سمعت الجملة دي.. لكن مكنتش عاوز اسمعها كتير.. كنت عاوز امشي بقى

واشكال ايه محترمة اللي بيتكلم عنها ده انا دقني كانت طويلة وكان بقالي 4 تيام ما استحمتش ولا غيرت هدومي وشكلنا كان كأننا هربانين من السجن

قبل ماندخل مكتب مدير المنطقة طلب مننا العسكري اننا نطلع موبايلاتنا والمحفظة ونحطها ف الشنطة اللي فيها الكاميرا.. عشان ممنوع ندخل بيها

دخلنا على مدير المنطقة وكان مشغل التليفزيون القناة الخليجية اياها اللي شغالة 24 ساعة بنات بيرقصو شكشكة على مسرح.. وكان طول اللقاء بيبصلنا شوية وشوية يبص عالتليفزيون

الحقيقة كان راجل كوميدي انا مامنعتش نفسي من الضحك من طريقته.. طلب مني يشوف اللي عالكاميرا.. طلبت منه انه يفكني لان الربطة كانت سيئة للغاية.. قالي اصبر.. قولتله ماحنا ف المكتب اهو ح نجري نروح فين؟ طبعاً الزميل كان عنده رد فعل في منتهى البرود ولو مكنتش انا طلبت ان ايدينا تتفك.. الموضوع بالنسبالة كان عادي.. المدير سألني عليها ايه الكاميرا.. قولتله انا مصور حاجات ف التحرير وده شيء عادي ودي كاميرا شخصية لا تبع قناة ولا حاجه.. قالي طيب وريني.. جيت اوريه لقيت الشرايط كانو شريطين متصورين.. اختفوا.. ملقتش غير الشريط الفاضي.. انبسط مني اما عرف اني اتصرفت ف اداة الجريمة.. ! مع اني ماعرفش فعلاً الشرايط دي مين خدها.. البلطجية ولا ضابط الجيش الاولاني؟؟

طلب من واحد تخين كده بيفكرني بالشاويش عطية.. انه يفتشنا.. فتشني ماطلعش مني غير المحفظة وبتاع 200 جنية وشوية فكة.. فتش زميلنا التاني.. طلع منه حسبه 6 تلاف جنية بين عمله مصرية ويورو ودولارات..

وده كان سبب ان الشاويش يقلعني كل هدومي من التفتيش ظناً منه اني معايا فلوس تانية مخبيها..

المهم عمنا مدير المكتب مسك اليورو ف ايده قعد يقلبه وهو مستغرب قام قايل للزميل : ايه ده.. ايران دي؟

ضحكت طبعاً.. قام الزميل قايله لأ.. ده يورو

قعد يعد الفلوس اليورو بالدولارات بالمصري.. وشكله ماقدرش يعدهم.. لان اليورو كان فئات مختلفة..

قام سأله: تقدر تقولي دول قد ايه؟ قاله.. 680 يورو و 200 دولار وألف ستمية جنية مصري.. قام رادد وقال يعني عامل نفسه عارف.. صح

سأل طبعاً الفلوس دي بتاعة مين فيكو ومنين؟ الزميل قال انها بتاعته وانه كان واخدها جايزة من مؤسسة صحفية عالمية.. وبيصرف منها ومالحقش يفكها

قال الحقيقة انا كنت ح اسيبكم لكن لازم اعمل تليفونات الاول عشان اعرف انتو تبع مين.. استنوني برة..

لبست هدومي وخرجت استنى بره.. وعمنا الشاويش عطية يبصلنا ويضحك.. تعالوا يا حبايبي.. ده انتو ح تشوفوا ايام جميلة.. سألته عن اسمه.. قالي اسمه حسن.. ناديته بإسمه عشان يبقى فيه حميمة لكن شكلي غلطت عشان واضح من نظراته انه كان طمعان ف حاجة من اللي شافها.. يا فلوس.. يا.. لامؤاخذه فيا اما قلعت

المهم

طلعنا بره لقيت شاب لابس قميص وبنطلون.. وف العشرينات من عمره.. طلب مننا اننا نبعد عن بعض واخد الزميل ف مكان بعيد عني ورجعلي بعد شوية طلب مني ايديا ورا ضهري وابص ف الحيطة.. انا بصراحة مانفذتش الكلام حتى بعد ما قالي انه مخابرات.. مخابرات؟ هو فيه مخابرات بيقول انه مخابرات..

ما التفتش لموضوع مخابرات

قعد يسألني شوية اسئلة هبلة كان اهم سؤال فيها

عرفت زميلك امتى ومين عرفك عليه

قولتله بكل ثقة اعرفه من زمان عن طريق واحده صحبتي

قالي اسمها ايه؟

قولتله اسمها داليا

ومين تاني صحابكم.. قولتله لينا صحاب كتير.. علي، سارة ، احمد ، هاني..فيه اصحاب كتير مشتركين

قالي ياه.. ده انتو شبكة بقى.

انفجرت من الضحك.. لدرجة انه ضربني بالقلم، طبعاً انا ضحكت لأن جملته فكرتني بأفلام نادية الجندي الهابطة، وعرفت بقى هو ليه قال انه مخابرات

قمت بصيتله بغضب وعليت صوتي.. ايه فيه ايه؟ هو الواحد حرام يبقاله صحاب ف البلد دي ولا ايه؟

عمنا الشاويش عطية ( اللي كان طمعان فيا ) جه وقعد يهديني وما صدق قام مطبط عليا

شوية ومدير المكتب نادى علينا.. دخلنا ودخل ورانا الشاب السيس اللي قال على نفسه مخابرات..

مدير المكتب قالنا انه مع الاسف مضطر يودينا مكان تاني عشان يتحقق معانا فيه

المكان التاني هو ايه؟ مش عارفين.. خدوا موبايلاتنا حطوها

الشاويش عطية دخل ومعاه عسكري لم حاجاتنا كلها بالفلوس حطها ف شنطتي اللي كان فيها الكاميرا

قبل ما نتحرك ويتحرك معانا واحد لابس ملكي ف عربية ملاكي.. مانساش الشاويش عطية يكفتنا.. بس المرادي كتفنا بسلك عادي ربطه على ايدينا.. ربط الزميل بأيديه قدام.. وانا ربط ايدي ورا ضهري.. ماكنتش اعرف ساعتها اشمعنى انا يربطني ورا ضهري ! لكن اما شغلت مخي عرفت

انطلقنا ف العربية وكان الراجل اللي لابس ملكي شكله بشوش.. عشان كده اتكلمت معاه.. ابتديت اتكلم معاه الأول ف العادي.. عن الناس اللي ف التحرير ورأيك فيهم.. ماعرفتش اقفله على رأي.. لكن احتياطياً انا قلت بهزار واضح.. الله يخرب بيوتهم بتوع التحرير جايبلنا الكافية.. ضحك وفهم اني بهزر وانا فعلاً كنت بهزر.. لكن الزميل اللي كان معايا مابيفرقش بين الهزار والجد سرعان ما لقيته اتعصب وقالي.. خلاص بسهولة كده بعت القضية.. قولتله اسكت انت خالص انت السبب.. وبدأت اغيظه شوية.. فيه حد معاه مبلغ زي ده يخرج بيه ف وقت زي ده

في الأثناء دي.. سمعنا تليفون الزميل بيرن جوه الشنطة.. ف قام موشوشني.. سارة كده عرفت وح تتحرك.. انا طبعاً الموضوع كان قالب معايا كوميدي قمت رديت عليه بصوت مسموع.. ومالك بتقولها بصوت واطي ليه كده خايف من ايه؟ سارة ح تتحرك طيب كويس.. قمت قايل للراجل اللي قاعد قدام ف العربية من غير ما يسأل.. أصل سارة دي صديقتنا وكنا قولنالها اننا اما نوصل البيت ح نكلمها نطمنها.. يالا زمانها اتحركت دلوقتي والصحافة بكرة مش ح يبقالها سيرة غيرنا.. وح نبقى مشاهير

قلت كده طبعاً من عشمي ان الراجل يفتحلنا الباب زي ما بنشوف ف الافلام.. ويعمل نفسه مش شايفنا ويسيبنا نهرب منه.. كان رد فعله ابتسامه خفيفة

وكان رد فعل الزميل.. بتقول فيها ياخويه.. بكرة تشوف.. ده انا الدنيا ح تتقلب عليا..

طبعاً ضحكت ضحك هيستيري

المهم

وصلنا المقر الرئيسي للشرطة العسكرية اللي امام سوبر ماركت مترو ف شارع خليفة المأمون بمصر الجديدة

كانت حوالي الساعة 2 صباحاً

وكنت جعان وأقلمت نفسي خلاص اني ح ابات الليلادي ف الأرض خلاص.. ياريتني كنت نمتها ف ميدان التحرير مانا بقالي كام يوم نايم هناك.. يعني جات عالليلة السودا دي واخرج م الميدان

وصلنا هناك الراجل دخل مكتب كده عشان يسلمنا ويكتب اسماءنا ف الكشف.. ماحنا بقينا من اللحظة دي عبارة عن ورقتين قاعدين يلفو معانا كل مكان نروحه.. سابنا مع 4 عساكر وقالهم : دول ناس محترمين ( جرى ايه ياجدعان احنا فين بالظبط؟ كل مانروح مكان يقولوا علينا ناس محترمه؟ هو فيه ناس هنا لامؤاخذه مش محترمة؟.. قعدوا يسألونا جايين ف ايه؟ ومعاكو ايه؟

قولتلهم انا جعان ومش ح اقول حاجه غير اما آكل.. عندكو اكل. .استغربوا من طريقتي واني مش دريان بالمصير المحتوم

دخلنا على مكتب فخم والباب كان مفتوح والعساكر واقفين ورانا والراجل اللي سلمنا قاعد على احد الكراسي وعالمكتب قاعد واحد تقريباً كان عقيد وقالنا انه ماسك المكان كله.. وكان فاتح التليفزيون برضو بس المرادي كان على القناة الأولى

اول سؤال سألهولنا انتو بتشتغلوا ايه؟

الزميل قاله انا مفصول من جامعة الازهر.. قاله واتفصلت ليه من الازهر.. قاله بسبب مقال كتبته واتحبست 4 سنين بتهمة ازدراء اديان وسب رئيس الجمهورية.. استغفر الله العظيم.. هكذا قال الرجل وقام باص ف بطاقتي وسألني. قولتله بشتغل مساعد مخرج.. واحياناً مخرج

سابه من الزميل خالص وركز ف موضوع مساعد مخرج ده

وقعد يسألني اشتغلت مع مين.. طبعاً كلمته بطريقة عادية بدون اي تكليف.. عديتله ناس اشتغلت معاها.. وطبعاً مكنش يعرفهم.. لغاية ما جيت على اسم خالد يوسف.. قام ماسكني.. اسئلة بقى.. هي غادة عبد الرازق بتقلع قدامكو كده عادي؟ قولتله بتقلع قدامنا ازاي؟ قالي يعني انا سمعت انها اما بتيجي تغير هدومها بتغيرها قدام الناس الشغالين ف الفيلم عادي.. قولتله يا راجل؟ ازاي ده انا اول مرة اسمع الموضوع ده.. قالي ياسلام يعني انت ما شفتلكش بـ.. باين كده ولا حاجه.. يعني هي اما بتوطي ولا بتبقى قاعدة براحتها مفيش حاجه بتبانلكم..

ابتسمت وعملت نفسي مكسوف.. قال كأني اتكشفت.. قمت قايله بكل سخرية ماعرفش مفهمهاش ازاي.. ما شاء الله حضرتك عرفت منين؟ لأ بجد انا مكنتش بعتقد ف موضوع المخابرات وأمن الدولة ده.. لكن حضرتك أثبتلي ان مفيش حاجه بتستخبى عليكم.. ما شاء الله والله

انا انتهيت من جملتي قام الزميل قعد يقولي قدامهم.. خلاص يا سمير بعت القضية

وانا اغيظة واكمل كلام مع الراجل اللي سرعان ما سأل الزميل.. ممكن اعرف انتو ايه اللي كان ممشيكو بالليل وايه الفلوس دي.. حكينا القصة كلها

قام راجع بالكرسي للوراء وقال.. تصدقوا انا لو يدوني أمر أني أنهي الموضوع ده ويسيبولي التحرير بس ساعة واحدة.. والله انزل ب 60 عسكري بس.. 60 ايه؟ والله لو 20 عسكري بس.. كل واحد بكرباج.. لأفضي التحرير ده خلال ساعة..

رديت عليه وقولت.. بس احنا عارفين يافندم ان قواتنا المسلحة ماتعملش كده ابداً.. قالي لا والله ياخويه تعمل بس.. عشان ميبقاش شكلنا وحش قدام العالم وحموم الإنسان بتاعتكو !

انا طبعاً ماصدقتوش.. لكن بعد اللي شوفته.. افتكرت كلامه

رجع تاني للزميل وسأله.. يعني حضرتك طالب ومعاك المبالغ دي كلها.. وبتقولي جايزة ومنظمة مش عارف ايه؟ يعني انت اقرب مثال على الشباب اللي بياخدوا فلوس من بره ومش عارفين هما بيعملوا ايه ولا بتوع بره دول بيستخدموهم ف ايه

طبعاً الزميل كان شكله وحش جداً ومعرفش يرد. لكن انا مصدقه انها جايزة.. لكن حظة كده نعمل ايه؟

المهم سألنا على متعالقتنا تاني عشان يكتبها ف الأمانات وقالنا انتو ح تباتو معانا لبكرة لغاية ما تتعرضو عالنيابة العسكرية.. والنيابة تشوف ح تعمل معاكو ايه.. قولتله طيب يافندم ممكن بما اننا ح نبات اكلم امي اطمنها عليا

قالي ممنوع استخدام التليفون.. وبعدين كلها مسافة الليل وبكرة تعمله اللي انتو عاوزينه.. قولتله طيب مبدأيا انا جعان وبما اننا ح نبات هنا عاوزين نشوف كرم الضيافة بقى.. قالي ح يجيلكو أكل وكل حاجه ما تقلقوش..

سلمنا متعلقاتنا كلها الفلوس بالمحفظة بالشنطة بالمفاتيح بالموبايلات وبقينا عالأبيض

وخدونا العساكر وهما مبتسمين.. ماعرفش مبتسمين عشان سمعوا الحوار اللي دار بيننا وبين الريس بتاعهم.. ولا مبتسمين ليه؟؟

خدونا ودخلونا عنبر متوسط حوالي 6 متر ف 10 متر.. وفيه ما يقرب من 80 شخص نايمين عالأرض.. اللي منهم نايم على كرتونة واللي نايم على بطانية قديمة.. واشكال المقبوض عليهم ما شاء الله.. مفيشهمش غير 2 بس مش واخدين مطواه ف وشهم.. اول سؤال اتسألناه.. هو ايه اللي بيحصل برة؟ المظاهرات اتفضت؟

سألناهم انتو بقالكم قد ايه؟ لقينا اللي جاي من يوم 28 يناير – سرقة المتحف.. واللي جاي يوم 2 و 3 فبراير موقعة الجمل.. شاورولنا على عيال كده شكلهم مابين الاجانب والبدو.. شعرهم اصفر وعينيهم ملونه لكن مصريين.. قالولنا ان دول بتوع نزله السمان بتوع الجمال والحصنة.. كانو حوالي 6 افراد.. حاولت اتكلم معاهم ما رضيوش يتكلموا نهائي.. وبقية المقبوض عليهم قالوا انهم واخدين جنب ومش بيكلموا حد

الله.. بقى ناس موجودة من يوم 28 هنا.. واضح اننا ح نقعد كتير هنا.. شوية وباب العنبر فتح.. جالنا عسكري معاه رغيفين عيش متعاصين مربى وقالنا كلوا.. طبعاً كان استحاله آكل.. قولتله انا عاوز آكل طبيخ انا بقالي كتير باكل نواشف.. هو ف التحرير وهنا كمان.. ماردش ولا ادى اي انطباع وسابلنا الاكل وقفل الزنزانة ومشي..

احد المحتجزين قالنا.. لو مش ح تاكلوا فيه ناس جعانه.. قولتله انا عن نفسي مش حاكل.. ابتسم وقال.. بكره تاكل.. كلنا كنا اول يوم كده.

بصراحة ف اللحظة دي الابتسامة اللي كانت على وشي راحت.. وحسيت بضيق نفس شديد.. ومبقتش بفكر ف أي شيء غير اني عاوز اخرج من المكان ده

خبط عالباب وناديت بأعلى الصوت.. دفعة يا دفعة.. جالي واحد قالي فيه ايه؟ قولتله عاوز ادخل الحمام.. قالي مفيش حمام.. كام ساعة والصبح يطلع

بقية المحتجزين وسعولنا وقعدونا ف مكان مميز نوعاً ما كان عليه بطانية شبهه دايبه.. وعملنا الجزم كمخدات وحاولت انام طبعاً ماجاليش نوم بس ريحت شوية جسمي.. لغاية ما طلع الصبح.. فتحولنا الباب الشمس دخلت بقوة.. قالولنا اللي عاوز يدخل الحمام.. كل شوية ويجيلنا شاويش.. او ظابط يسأل عننا.. فين بتوع الكاميرا والفلوس؟ نوريله نفسنا ويقوم.. لحد ما جات الساعة حوالي 11 الظهر.. وجه وقت الاكل.. عيش ومربى.. كل واحد رغيف عيش.. او كما يسمونه ف الجيش.. جراية.. ياه بقى انا مادخلتش الجيش.. وبرضو اسمع كلمة جراية اللي كنت بسمعها من صحابي اللي اتجندوا دول؟ كابوس.. انا شكلي عايش ف كابوس

جالنا واحد وسأل عننا تاني وقال فين بتوع الكاميرا والفلوس.. شافنا ونادى للزميل.. طلعله بره وباب العنبر اتقفل وراه.. وبعد ما الزميل ما رجع لقيته مزبهل وبيقولي.. شفت مش قولتلك

قولتله ايه طمني.. قالي مفيش اتكلم معايا شوية وشكله عارفني.. مش قولتلك اني مشهور؟ يابني انت تحمد ربنا انك اتاخدت معايا..

ارد عليه اقوله ايه واحنا ف الظروف دي؟ عملت نفسي مش سامع كلامه وقولتله يحكي.. قاللي ان الراجل سأله لو عندك حد عاوزني اكلمهولك اعرفه مكانكم.. وبالفعل الزميل اداله رقم صديقتنا سارة

الوقت عدى واحنا لسه ف المخروبة اللي احنا فيها دي ومش عارفين هل ح نتعرض على نيابة فعلاً النهاردة ولا ح نترمي زي الناس دي وماحدش ح يسأل فينا.. سألت السؤال ده لكل عسكري او شاويش اشوفه لكن دون جدوى.. كلهم بيقولوا خير ما تقلقوش

فين وفين جه واحد وقعد ينادي على اسماءنا.. وقالنا تعالوا.. وكان معاه الشنطة بتاعتي فيها كل الحاجات ومعاه ورق ف ايده اللي المفروض زي ما قالنا هو محضر استلامنا.. كان راجل شكله محترم.. دايما اللي بيسلمونا من مكان لمكان كانو محترمين

قالنا اننا ح نروح مكان تاني فيه النيابة عشان النيابة كانت المفروض تكون هنا لكن عندهم قضايا كتيرة ف نقلو مكاتبهم للسجن الحربي مؤقتاً.. اتحركنا ف عربية جيب كده انا مش عارف هي كانت بتتحرك ازاي من شكلها وحالتها المخستعه.. وكنت طول الطريق بحاول افهم منه ايه اللي ح يحصل.. وافهمه ان احنا بتوع التاكسي.. دي حقيقة مش تهريج ولا تريقه على الفيلم بتاع احنا بنوع الاتوبيس

دخلنا عالسجن الحربي في منطقة الهايكستب. ومش ح اتمادى ف وصف المكان كتير عشان مايقولوش اني بفشي اسرار عسكرية.. المكان اصلاً معروف انه ف الصحراء.. على طريق السويس.. ومفيهوش اي حاجه تتوصف

وصلنا وفضلنا عالباب شوية.. قعدنا نرغي مع العسكري اللي كان سايق العربية العبقرية اللي كنا راكبيناه وانا شخصياً ابتديت افك وارجع للحس الكوميدي ف الموضوع.. واعربت عن قلقلي طول الطريق ان العربية دي توصل بينا سليمة.. وقولتله انه بطل انه قدر يمشي بيها كل ده عالرغم ان الباب اللي جنبه كان مخلع وكل شوية كان يتفتح منه.. ووعدته لو خرجت بالسلامة ممكن اشوفله حته سلك اربطله بيها الباب

اتفتحلنا الباب الكبير بتاع السجن بعد ما خدنا التصريح بالدخول واتسلمت حاجتنا.. دخلنا لقينا مجموعة كانت داخله قدامنا وبيتعملها تشريفه.. وكلمة تشريفه دي كنت بسمعها الحقيقة لكن عمري ما شفتها.. وهي كالتالي.. ولاحظوا اني بتكلم عن جيش مش شرطة

الشباب اللي كان معظمهم متاخدين حظر تجول.. بينزلو واحد ورا التاني من عربية الترحيلات.. بيستقبلهم العساكر ضرب بالايد لغاية ما يوصلو لمكان يقلعو فيه كل هدومهم ماعدا الشورت.. ويستلمهم مجموعة تانية من العساكر والضابط أشرف وينزلوا فيهم ضرب لغاية ما يبانلهم صحاب.. والضرب هنا كان بيتم بكرابيج وخراطيم وعصيان كهربائية.. واللي كان بيحاول يعترض أو يفهمهم انه محامي او طالب جامعي محترم او معيد ف الجامعة.. يتلمو عليهم بال 5 سته ويعدموه العافية

احنا كنا شاهدين عالمنظر ده وجات عربية تانية حصل فيهم نفس اللي حصل

دخلنا ف مكان ومعانا الراجل اللي المفروض يسلمنا.. كان بيسلم الامانات وواحد قالي لو عاوز تخلي معاك فلوس عشان لو عوزت تشتري حاجه من جوه.. تفائلت الحقيقة.. مش لأي سبب غير اني حسيت ان جوه ح تبقى الحياة حلوة وكانتين وبتاع.. خدت 10 جنية فكة مؤقتاً على اني لو عوزت فلوس اطلب.. ههههههههه ايه العشم اللي كان فيا ده

رجعنا تاني للمكان اللي بتحصل فيه التشريفه والراجل سلمنا وقال للصول اللي استلمنا الجملة الشهيرة.. الناس دي شكلها محترم

وقام رايح للضابط اشرف قايله نفس الكلمة ف ودنه

الضابط اشرف جه علينا ومعاه الدكتور وطلب مننا اننا نقلع هدومنا عشان يتكشف علينا ونتفتش وحذرلنا لو معانا موبايلات او ميموري كارت او اي حاجه.. جه عسكري وعاوز ياخد الجواكت والبلوفرات والجزم بتاعتنا.. عشان فيه تعليمات ان مينفعش تبقى قاعد مدفي ولازم تحس بالبرد.. لكن حصلنا استثناء وسابولنا الجواكت بتاعتنا والجزم.. لبسنا هدومنا ودخلنا ناحية العنابر

دخلنا العنبر وكان اشبه فعلاً بالعنبر بتاع فيلم احنا بتوع الاتوبيس.. حوش واسع ومجموعة من الزنازين المتفاوته المساحة وكاميرا ف وسط الحوش بتصور اللي بيحصل.. لقينا حضرة الصول اللي الراجل وصاه علينا دخل على صول تاني اسمه عمر وعسكري اسمه ماهر ووصاهم علينا.. والحقيقة يادوب مشي.. راح العسكري ماهر خدنا بعيد عن الكاميرات وقام مقلعنا هدومنا عشان يفتش..

انا قلت ف الأول احتياطات لكن السفاح ماهر كان بيفتش على فلوس.. وبالفعل خد ال10 جنية اللي كانت ف جيبي وهو عينه ف عيني كده.. بدون اي خجل.. قلت ف داهية المهم كده كسرت عينه وحيعاملنا كويس.. لقيناه بيعاملنا اسوأ معاملنا.. ح نشوف

في الاثناء دي احنا طول الوقت سامعين اصوات داخل الزنازين.. ناس بتصرخ وبتطلب انها تخرج وناس تانية بتضرب ف ناس وناس بتتكلم لغات اجنبي وفرنسي

الصول عمر قال انه ح يقعدنا ف زنزانة اسمها التأمين.. ودي زنزانة لطيفة مساحتها حوالي متر ونص ف مترين.. مش مهم بس المهم اننا ح نكون لوحدنا وزنزانتنا مقفوله علينا

شوية وباب الزنزانة فتح وجالنا ماهر ولابس بتاعه حمرا كده على دراعة عرفنا منها انه مسك صف عسكري المكان.. مش فاهمين اي حاجه م اللي بيحصل بس المهم ان عمر اختفى ف نفس اليوم اللي جينا فيه ومسكنا العم ماهر

فتح باب الزنزانة ودخل ووراه واحد معاه العيش والمربى.. ادانا كل واحد رغيف عيش.. وبحته معلقة مكسورة كده خد من علبة المربى ورماها عالعيش.. ودي كانت طريقتهم ف اعطائنا الأكل.. وانت وحظك بقى حته المربى تيجي عالرغيف.. تيجي ف وشك.. ماتجيش خالص.. انت وحظك.. قالنا كلوا عشان مفيش اكل تاني غير الصبح.. كنا حوالي المغرب

كلنا وانا شخصياً مكنش ليا نفس كلت نص رغيف بحته المربى.. وقلت اخلي نص الرغيف التاني للطوارىء.. ف جيب الجاكت.. ماهي بقت كده.. بعد ماكان الواحد ملوش نفس للأكل.. ابتدى يتأقلم عالجو

ما اتأقلمتش قوي لاني كنت طول الوقت خايف من مصيرنا المحتوم.. وفكرة السجن كانت صعبة بالنسبالي وخصوصاً انه يكون فيه سجن داخل سجن.. واقصد هنا الزميل اللي اتقبض عليه معايا.. كان طول الوقت يقولي.. وايه يعني اما نتحبس 6 شهور.. انت عارف انا اتحبست كام يوم؟؟ 1470 يوم.. هو يقول كده وانا اتنطط واقوله.. انت بتقول ايه..؟؟ انت عارف يعني ايه افضل هنا 6 شهور؟ ده انا مستقبلي يضيع وأموت

طبعاً الكلام ده كان أول يوم لينا ف السجن الحربي.. مكنتش اعرف اني ح اغير رأيي اما الاقي الدنيا سواد..

الصف عسكري ماهر بعد ما جابلنا الأكل.. نقلنا لزنزانة تانية كان فيها حوالي 12 نفر ومساحتها برضو متر ونصف ف طول 3 متر.. والزنزانة دي كانت غاية في القرف.. ريحتها كانت وحشة جدا.. وكان معانا فيها ناس من نيجيريا وناس من السودان بالاضافة للمصريين.. وبتاع السودان كان بيعملها على روحه ف الزنزانة الضيقة دي وكانت بتقلب ريحة العنبر كله.. سألناه ليه ما جاوبش.. بس فهمت بعد كده من ابتسامته الصفراء.. ان ده نوع من التمرد.. بس كان بيقرفنا ابن اللذين.. المهم ف اليوم ده كان رهيب جداً واكاد اكون ماعرفتش انام..

كنا نايمين على جنبنا عشان مفيش مساحة..

والزميل اللي كان معايا كان نايم جنبي.. ونام بدري قوي حوالي الساعة 10 مساءا.. وانا فضلت صاحي. ساعتها قعد يشخر طول الليل.. لدرجة ان واحد من اللي معانا ف الزنزانة.. طبعاً الدنيا كانت ظلمة محدش شايف حد.. واحد معانا صوته بلطجي او ماعرفش ماله لقيته بينادي بصوت عالي.. الاخ اللي بيشخر ده.. فيه واحد جاي معاه.. ياريت تسكته عشان ماقمش اسكته انا.. قولتله اسكته ازاي يعني؟ قالي ارفع دماغه بأي حاجه.. شلت جزمتي من تحت دماغي وحطيتها تحت دماغ الزميل عشان ارفع المخده بتاعته.. اللي كانت معمولة من جزمته برضو.. سكت شوية ورجع تاني.. ورجعت التهديدات ليا..

لغاية ما طلع علينا النهار.. وعملنا طابور تمام

ف الطابور ده اتعرفنا على كل الناس تقريباً.. ف لقينا المعيد ف الجامعة.. والطالب ف الثانوي.. والصنايعي.. والفلاح .. والمزارع.. جالنا الظابط اشرف بنفسه عشان العدد.. وف اليوم ده سمعت كمية من الشتايم رهيبة..

عشان حضرة الضابط كان عاوز يخلينا نعد نفسنا بنظام عساكر القوات المسلحة.. ودي كانت صعبة على بعض الناس اللي على أطراف الصفوف وكانو دايماً بيتلخبطوا

ف اليوم ده حضرة الضابط أشرف حب يستعرض قدرته العظيمة على المعتقلين لديهم.. وقوم كام واحد وطلب من كل واحد يحكي حكاية.. واللي كان بيرفض كان بيطلب منه يقلع هدومة ويغرقه بالمية ويذنبه ف الظل.. عشان ما ينشفش من المية

وعلى سبيل المثال وليس الحصر.. شاب عمره حوالي 17 سنة قام يستأذن في دخول الحمام ف حضرة الضابط أشرف هذله راسه.. ف الولد اتحرك ناحية الحمام.. ف الضابط أشرف اتهمة انه بيستعبط وغرقة ميه ونيمه على بطنه ف حاجه زي البانيو كده واطية عن مستوى الارض ومليانة ميه..

الحمام بقى كان حدوته كبيرة.. الحمام مفيهوش ميه.. وبدون ابواب.. والميه كانت بتيجي ف جراكن.. حوالي 30 جركن وف الغالب كانوا بيخلصو ف أول اليوم.. واللي يلحق.. واقعد بقى بقية اليوم من غير ميه.. والصادم ف الموضوع ان الاطباق والحلل اللي كانوا بيغرفوا فيها الأكل.. كانت بتتغسل ف الحمام ده.. الحمام الغير صحي ولا آدمي بالمرة.. ولا اعتقد ان الحيوانات ترضى تستخدمه..

وأغرب مشهد شفته.. أحد الأطباق الصغيرة - المميز الشكل - كان بيتبول فيه أحد المحتجزين أول اليوم.. وبيشرب منه محتجز آخر.. آخر اليوم..!

نرجع لقعدة الظابط أشرف.. بعد موقف الواد اللي اتغرق ميه.. حضرة الضابط أمر ان محدش يتحرك من مكانه يقوم غير اما يستأذن الأول.. وقام باصصلي انا والزميل اللي معايا وابتدى يسترسل في الكلام مع المحتجزين، مبرراً الطريقة الغير إنسانية اللي بيتعامل بيها مع الكل..

ف قام منادي.. فين الواد اللي قتل 6 عساكر؟ قام واحد رافع ايده

قاله إسمك ايه؟.. قاله إسمي : احمد عبد الله هاشم

قاله: انت جاي ف ايه؟ قاله ( بطريقة محمد صبحي ف العميل رقم 13 ) انا قتلت 6 عساكر.. واغتصبت مهندسة زراعية.. وسرقت سلاح.. طبعاً الواد كان بيتكلم بكل ثقة لدرجة اني فكرت انه ممكن يكون معاهم.. بالفعل فيه واحد قالنا ان الواد ده كان لابس تحت هدومه لبس جيش.. وقاعد يهددهم ف الزنزانة محدش يقربله عشان هو ضابط ف الجيش.. لم اتأكد من المعلومة دي ان كانت صح ولا غلط.. بس حابب أقول ان الشخص ده كان من اوائل المفرج عنهم.. ليلة التنحي

المهم.. حضرة الظابط اشرف باصللنا كده بإبتسامه مزيفه.. شايفين..؟ عاوزينا نتعامل ازاي؟ واحد مجرم زي ده قاعد ف الزنزانة وبيهدد زمايله.. عاوزيننا نتعامل معاه ازاي؟

قام مقوم واحد تاني.. وقالنا.. الواد ده مثلاً.. اغتصب دكتورة.. وهو نازل لقى واحد صحبه قاله: فيه دكتورة فوق.. كده.. اطلع شوفها.. قام صاحبه وهو طالع اتقبض عليهم هما الاثنين.. اشرح لزمايلك بقى اغتصبتها ازاي؟ ها.. كانت حلوة؟ ماتنطق يابن ال.. عملت معاها ايه؟؟

الواد قعد يلف ويدور وف الآخر حكى بداية الحكاية واسترسل قام حضرة الضابط زهق منه واشتغل على واحد تاني.. وهكذا..

أحد المحتجزين ميل علينا وقالنا.. مستغربين؟ امال لو شفتوا اللي كان بيحصل فينا من يومين؟.. ايه؟ كانو بيوقفونا مقرفصين على رجلينا وحاطين ايدينا فوق راسنا.. ويخلونا نقول كلنا بصوت عالي .. هذا ما جناه أبي !.. قولتله اشمعنى؟ قالي ماحنا سألنا ليه.. قالولنا.. مش ابوك هو السبب إنك جيت الدنيا دي؟.. يبقوا هو اللي جنى عليك.. اللي كان بيلاعب شفايفه بس ويعمل نفسه بيقول.. كان بينضرب ويتشتم.. كان لازم كلنا نقول بصوت عالي لغاية ما نجيب دموع.. هذا ما جناه أبي..!

فات اليوم وجابولنا الطقة اليومية.. وحذرونا اننا لو حصل اي مشاغبة مش ح يبقى فيه طقة تانية.. والاكل كان عبارة عن.. لحسة مربى ورغيف عيش.. بعدها بشوية لمحت الصول عمر اللي كان عندنا قبلها بيوم.. وقعدنا ف الزنزانة الصغيرة وجرينا عليه طلبنه منه انه يرجعنا الزنزانة الصغيرة وشرحناله المعاناه اللي شوفناها ليلة امبارح.. طبعاً ماهر كان متغاظ مننا اننا تخطيناه وروحنا لعمر وابتدى يعملنا وحش.. يعني شتيمة وقلة ادب وسفاله.. وعالرايحة والجية يفتشنا عشان يقفش مننا فلوس تاني.. ولا مانع من انه يمد ايده علينا بحذر.. عشان كان واخد باله اننا مش بس محبوسين.. احنا كمان بنراقب التصرفات.. المهم نقلونا بالفعل ف الزنزانة اللي بتاخد نفرين.. واللي كانو مسمينها " التأمين " وف نص اليوم لقيناهم بيجيبولنا عليها 3 محتجزين لسه مترحلين جداد.. وقالولنا دول ناس محترمة زيكو واستحملو بعض.. يا اما ننقلكم كلكم على الزنزانة الكبيرة

وكانو المحتجزين الجدد معانا كلهم غير مصريين.. مروان من العراق.. عدلي وسائد من فلسطين.. طبعاً ف البداية كنا قلقانين لكن اكتشفنا انهم طيبين.. مثلهم مثل معظم اللي كانو محجوزين ظلم ف السجن الحربي.. مروان وعدلي وسائد أول يوم قعدوا يحكولنا عن كل اللي حصل معاهم وطريقة التحقيق معاهم في المخابرات الحربية.. ومدى المعاناه اللي لقيوها.. لكن ده مش موضوعنا.. والكلام مادام ما شفتوش بعيني.. ف هو يحمل الصدق.. ويحمل الكذب ايضاً.. كانت صحبة كويسة حاولنا بيها اننا نتأقلم مع الجو عالرغم من اننا كنا 5 اشخاص ف زنزانة متر ونص ف مترين ونص.. الا اننا قعدنا نتكلم.. كل واحد اتكلم عن تاريخ بلدة.. مروان كلمنا عن العراق واللي بيحصل فيها.. وعدلي وسائد كلمونا عن فلسطين.. والتلاته كان عندهم هاجس انهم يترحلوا.. لكن انا وزميلي كنا بنصبرهم

فات اليوم ده وصحينا تاني يوم الصبح على تخبيط بقوة في على باب الزنزانة.. وبيقولونا ان فيه ناس ح تتعرض نيابة.. وفيه ناس ح تستنى شوية

اوائل الناس اللي اتعرضوا عالنيابة كان مروان وسائد وعدلي.. واحنا استنيناهم في الحوش.. وحصل طابور عشان تمام العدد وحصل فيه نفس المسخرة اللي حصلت.. بس الزيادة ان اللي كان بيعمل كده مش حضرة الضابط اشرف اللي ما شفناهوش ف اليوم ده..

لأ ده كان أحد العساكر كان فاتح الراديو جنبة.. والاغاني الوطنية شغاله على احدى اذاعات الاغاني.. الاغنية تلو الاخرى.. وهو بيتلذذ بضرب واهانة وتذنيب اشخاص ابرياء.. كلهم بلا استثناء اعلى منه في المستوى التعليمي.. ماعرفش هو كان قاصد يشغل الراديو على محطة بتذيع اغاني وطنية ولا لأ.. لكن كان مشهد درامي قوي وهو شغال ضرب وبيردد يا حبيبتي يا مصر يامصر... ! وطبعاً الكاميرا اللي ف وسط الحوش بتصور.. والمفروض ان القادة اللي اعلى منه شايفين ايه اللي بيحصل.. لكن ح نقول ايه.. إذا كان هو شايف حضرة الضابط أشرف بيعمل كده قدامه.. يبقى العسكري الصغير مش ح يعمل كده وهو حاطط رجل كمان

جالنا مروان وسائد وعدلي وحكولنا على تفاصيل تحقيق النيابة.. ومروان قالي انه ح يكون فيه محامي ح يتكلم مكانك.. ويا يلبسك ويقول حصل بس موكلي ماكنش يعرف.. او يقول ما حصلش.. وانت ملكش حق تتكلم !!.. مروان العراقي.. كان رايح ف قضية متلبساله نكايه من واحده كان يعرفها.. وكانت القضية عبارة عن حيازة رصاص حي.. ولبس ملابس عسكرية.. وهو حسب روايته هو كان بيقول انه اتقبض عليه ولبس القضية دي..

المهم شوية وجالنا محتجزين جدد واول ما شوفناهم انا والزميل اللي معايا ابتدينا نسألهم.. ايه الاخبار بره وايه اللي بيحصل في التحرير؟ والناس اللي ف التحرير بخير؟ مشيوا ولا قاعدين؟ كان النهاردة موافق 8 فبراير.. بصراحة ماحدش فادنا من الناس الجديدة.. بسبب انهم كانو محتجزين اصلاً من اول الشهر ( يعني من قبل ماندخل احنا ) لكن كانو محتجزين ف اماكن اخرى مختلفة

واذكر منهم واحد في الثلاثينات من عمره.. كان محبوس ف سجن ابو زعبل وحكالنا قصة تهريبهم من السجن.. ان مأمور القسم دخل عليهم هما والظباط وحط فدامهم السلاح.. وقالهم.. كل واحد ياخد سلاح ويخرج بره السجن.. إفراج

الشخص ده كان واخد 3 سنين وقضى منهم سنتين ونص.. خاف يخرج ليتحاكم وقالهم انا قاعد اكمل المدة بتاعتي.. ف راح احد الضباط معمر السلاح بتاعة وكان ح يقتله.. قام سامع كلامهم وخد السلام وهرب برة السجن وراح سلم نفسه ف أقرب شرطة عسكرية.. خدوه حققوا معاه شوية وبعدها رحلوه على هنا

اليوم ده جابولنا طبيخ.. قلقاس مطبوخ زي صينية البطاطس كده.. ولحمة.. كل واحد نصيبه من اللحمة حته قد عقلة الصوباع.. ورز كتير بقى اللي عاوز ياكل ياكل.. اذكر ان الزميل بتاعي ساب الدنيا كلها وقام قايلي.. شايف مش قولتلك متوصي علينا؟ لولا انك معايا مكنتش كلت الاكل ده؟؟ قولتله متوصي علينا منين يا خويه اتنيل.. هو اصلا حد يعرف احنا فين؟ ولا هما العسكر دول ينفع معاهم توصية ولا نيلة.. بلاش تهيأت ونبي وخليني ف اللي انا فيه

اليوم ده العساكر كانت بتجر معانا ناعم.. لدرجة اني ابتديت اصدق كلام الزميل.. لكن عرفنا بعد كده ان تاني يوم فيه مأمور السجن ح يمر وبتاع.. ف اليوم ده كان فيه واحد محبوس معانا

اسمه كريم عابدين.. ده كان ف السنة النهائية كلية العلوم – أزهر.. ده بقى حكاية.. الواد ده من كتر الكهربا اللي كان بيتكهربها من العساكر والظباط جسمه كان محروق.. وتقريباً حصله حالة من التوهان الذهني لدرجة انه اما كان بيتنادى اسمه.. كان المحتجزين اللي يعرفوه.. يشاورو عليه ف اشارة انه حتى إسمه.. نساه

ف اليوم ده كريم عابدين قعد يتلفظ بلغة غريبة.. ماعرفش دي عربي ولا لاتيني.. جابوله دكتور ادوله حقنه وحطوه ف زنزانة صغيرة.. تسع فرد واحد.. وقفلوا عليه.. والزنزانة دي كانت جنبنا على طول

الولد عمل حركة كانت باسطانا الحقيقة.. احنا طبعاً كان مقفول علينا الزنزانة.. الولد طول الليل يخبط على الباب الحديد للزنزانة وعرفنا بعد كده انه كان بيخبط بكرسي.. واما جم العساكر يفتحوله الباب يشوفوه عاوز ايه وبيخبط ليه.. نزل فيهم ضرب لدرجة اننا سمعنا صراخهم.. وطبعاً ف النهاية تم السيطرة عن طريق العصا الكهربائية.. الحقيقة.. لا أخفي اني من كتر التركيز ف اللي بشوفه او بسمعه.. جاتلي حالة من فقدان جزئي للذاكرة

والحكاية كما رويت لي من ال4 زملاء بالزنزانة كانت كالتالي.. كانت في فجر تلك الليلة المشئومة اللي انضرب فيها واتكهرب الاخ اللي ف الزنزانة المجاورة.. صحيت من النوم اخبط عالباب بقوة.. جالي العسكري وفتحلي شباك الباب الصغير وقالي انت مين.. قولتله انا اسمي سيف.. !! سيف؟؟ وعاوز ايه يا سيف؟ قولتله انا عاوز بطاقتي عشان أروح؟ العسكري ضحك وقالي تروح ليه مانت قاعد.. انت جيت ازاي؟ قولتله انا شغال موظف عمومي وكنت بجيب أكل لصحابي هنا وعاوز اروح عشان عندي شغل الصبح.. العسكري قعد يضحك وقفل شباك الباب وانا رجعت للنوم.. الزملاء بالزنزانة ما كانوش راضيين يحكولي حكاية زي دي لكن اللي حصل انه تاني يوم الصبح ( صباح 9 فبراير ) العسكري فتحلنا الباب وسأل.. مين اللي كان بيخبط وعاوز يروح امبارح؟؟ قام سرعان ما رد عليه الزميل الفلسطيني سائد.. وقاله انا.. معلهش ما تآخذنيش أصلي كنت بحلم.. انا طبعاً قعدت اسأل سائد ايه اللي حصل ايه اللي حصل.. وهو قعد يحكي.. على انه هو.. وهما متابعين الحوار.. لكن انا ف لحظة ما افتكرت اني فعلاً قمت بس مش فاكر تفاصيل.. وخصوصاً ان سائد كان بيحكي وهما كلهم بيبصولي ويضحكوا.. لغاية ما الزميل اللي معايا صارحني باللي حصل ده.. ساعتها حسيت اني خلاص.. يومين وح ابقى زي المحتجز اللي نسي اسمه وبيتكلم ده

ف اليوم ده كنا حاسيين ان فيه حاجه ح تحصل هي ايه..؟ مش عارفين.. قعدنا من بداية اليوم نحفظ بعض ارقام تليفونات قرايبنا وكل واحد حفظله رقمين.. انا حفظت رقم لمروان ورقم ل عدلي وسائد مع بعض.. وهما حفظولنا رقم واحد ليا انا والزميل اللي كان معايا.. وكان رقم اخويا الصغير أحمد.. قعدنا نحكي ف اليوم ده كتير لغاية ما جه نص اليوم.. حكيتلهم عن الخطوات اللي ممكن ياخدها اخويا بدءاً من اتصاله بالعميد ميت ( محمد عادل 6 ابريل ) وحتى موضوع الصفحة اللي عملهالي عالفيس بوك.. اخويا بقى وفاهم دماغه.. ومروان قعد يكلمنا عن دكتورة صديقته اللي اداني رقمها.. وقعد يكلمنا شوية عن مراته وابنه.. والزميل اللي كان معانا قعد يكلمنا شوية عن التصرف اللي ممكن تعمله سارة صديقتنا وبقية المؤسسات الحقوقية اما يعرفوا انه مقبوض عليه! ولا يخلو كلامه من نبره.. انتو تحمدوا ربنا انكم معايا.. ده حتى الاكل اللي بيتقدم مستواه بقى احسن من ساعة ماجيت هنا.. ههههههه.. الحقيقة كان الاكل ف اليوم مختلف.. كان فيه فول.. وفول ف الظروف اللي زي دي.. في ظل العيش والمربى.. كانت حاجة عظيمة.. سائد كان بياكل كتير.. وكان مصاحب العساكر.. وطلب منهم اننا مانخرجش مع بقية الناس نستلم الاكل.. وانه ياريت ينادو عليه يستلم هو اكل ال 5 اشخاص.. اللي هما احنا.. وانه مش مهم خلينا ف الآخر المهم اتوصوا بينا.. عشان كنا جعانين فول جداً.. كلنا لغاية ما شبعنا.. وسائد كالعادة مرضيش يرجع طبق الاكل غير اما يحتفظ بما تبقى من الاكل عشان لو حد جاع بالليل.. كل مرة بيقول كده وهو اللي بياكل الاكل لوحده.ههههههه

فكرة انك تبقى محبوس ف زنزانة بالمساحة دي كل ما فكر فيها بيجيلي ضيق تنفس وببقى ح انفجر.. لكنهم طول الوقت كانو بيصبروني.. كل واحد بطريقته.. معظمهم كانو بيقولو اننا ح نطلع.. اما الزميل اللي كان معايا.. ف بيتهيألي كان عاوز يقعد اكبر فترة ممكن.. ولا اعلم السبب

جه صول من أوائل الناس اللي قابلناها ف السجن الحربي.. ونادى شوية اسماء.. وانا والزميل ف وسطهم.. الحمد لله.. افراج؟ لأ ح تتعرضوا عالنيابة العسكرية.. واحنا ف طريقنا للنيابة.. كان كل اللي يشوفنا يقولنا.. انتو بتوع الكاميرا والفلوس؟؟ من عقداء بقى ولوائات قاعدين وضباط وعساكر.. بقينا مشهورين ف المكان

اكدت على زميلي شوية حاجات قبل ماندخل اهمها اننا ماتقبضش عليها ف المتأخر.. واننا كنا نازلين وسط البلد عشان نشتري موبايل جديد بدل موبايلي اللي ضاع ونشتري ميموري كارد للكاميرا. وان الوقت اما اتأخر ماعرفناش نرجع مصر الجديدة وقولنا نروح الهرم.. وأهم حاجه.. اننا ماكناش ف التحرير ولو ضغطوا علينا قوي.. ح نقول اننا عدينا بصينا بصه.. وخصوصاً اني كنت فاكر ان الميموري كارد كان متصور عليها كام صورة كده لشعارات ف التحرير.. وممكن وكيل النيابة يطلبها مني.. الغريب ف الموضوع اننا كان لازم نكذب.. عالرغم من اننا ماكناش بنعمل حاجه غلط.. ايه يعني كنا ف التحرير.. وهي دي جريمة؟؟؟ ما علينا

وقفونا ف الشمس شوية.. وشنا للحيطة قبل ما نطلع للمبنى اللي فيه النيابة.. وكان وكيل النيابة اللي بيحقق معانا لابس لبس جيش برضو.. وطلب مننا انه يحقق مع كل واحد على حده.. وهنا جاءت اللحظة الكوميدية ف الموضوع كله

س: انت اتقبض عليك فين؟ وعليها ايه الكاميرا دي؟

ج : حكيتله انه اتقبض علينا من لجنة شعبية مش فاهمة حاجه سلمتنا للجيش وكنا راجعين من وسط البلد

س: عليها ايه الكاميرا دي؟ وكنتوا راجعين من وسط البلد ازاي؟ تقصد التحرير؟ وايه اللي وداكم؟

ج : لأ ماكناش ف التحرير.. انا كان موبايلي ضايع وكنا نازلين نشتري موبايل انا وصحبي واشترينا ميموري للكاميرا

س: يعني الكاميرا دي معليهاش حاجه متصورة من الميدان؟ وفين الشرايط؟

- التحقيق اشبهه بشغل أمن الدولة.. مع اننا وقتها كان 9 فبراير.. والناس كلها بتتكلم عن شباب الثورة وشباب التحرير!!

ج : الميموري عليه كام يافطة كده صورتهم وانا ف طريقي.. ومفيش شرايط هو شريط فاضي بس..

س: وريني الكاميرا

ج: فتحتله الكاميرا ودخلت عالميموري.. وهو بيقولي اوعى تحذف حاجه انا شايفك.. وريتله الصور ابتداء من صورة للراجل اللي باعلي الميموري وانا بجربها.. نهاية بآخر يافطة صورتها.. والحمد لله ان الاضاءة كانت ضعيفة ومكنتش مصور متظاهرين.. كان كل همي اني اخرج من المكان ده او عالاقل اطمن امي عليا..

قاطعته ف وسط الكلام وقولتله لو سمحت ممكن اتصل بأمي اطمنها عليا.. رد بكل برود.. انت مينفعش اصلاً حد يعرف انت فين.. وخلي امك وابوك يلفوا عليك ويقلبوا عليك الدنيا.. عشان اهالي اصحابك اللي ف التحرير يعرفوا ويلموا عيالهم م التحرير.

هو قالي كده.. وانا قلت خلاص.. الراجل ده ح يشيلني 10 سنين.. وبعدين رجعت اقول بإستغراب.. الله مش ده وكيل نيابة.؟ يعني المفروض جه محايدة؟ ايه دخله ف التحرير والناس اللي ف التحرير.؟ هو بيحقق ف إيه دلوقت.. عرفت فيما بعد انهم بيقدسوا حاجه إسمها مبارك

لقيته مطلع من الاحراز ( قال يعني بقينا مجرمين خلاص ) ورقة كده كنت خدتها من واحد بيوزعها ف التحرير.. وبيوجهلي سؤال: انت متهم بتوزيع منشورات

رديت بكل هدوء.. منشورات ايه يا فندم وانت لقيت معايا 30 منشور؟ دي ورقة واحده خدتها من واحد كان بيوزعها وحطيتها ف الشنطة وقولت اما اروح البيت اقراها

س: مين اللي ادالك الورقة دي وفين؟؟

ج: مش فاكر حاجه.. ده كان يوم طويل وناس كتيرة بتوزع ورق ف الميدا.. ممكن اشوف الورقة عشان افتكر..

وراني الورقة.. وتلفظت انفاسي.. لاني قبلها مكنتش اعرف اصلاً الورقة فيها ايه.. لكن الحمد لله طلعت تدعو للتهدئه.. رديت بكل ثقة وقولتله ما الراجل بيدعوا للتهدئة اهو.. ياريتني كان معايا 30 ورقة من دول واتهمتني اني بوزعهم هههههههه.. خلاص الموضوع قلب كوميديا معايا.. وبدأ يكتب بجدية بالقلم في ورقة المحضر

س: اوصفلي بقى مواصفات الراجل ده وقابلته فين..؟

ج: يافندم مش فاكر؟

س: قول اي حاجه.؟

ج: أكذب يعني؟

س: آه اكذب.. قولي بقى شوفته ايه ولابس ايه..؟

ج: انا قابلته تقريبا ف شارع شريف

س: طيب كان لابس ايه؟

ج: مش فاكر

س: طيب كان بدقن؟

ج: آه دقن خفيفة

س: كان طويل ولا قصير؟ تخين ولا رفيع؟ لابس جلابية ولا لابس ايه؟

ج: انا كده ح اكذب على فكرة

س: إكذب.. ها مواصفاته ايه؟

ج: كان بين البينين.. ولابس قميص وبنطلون

س: القميص كان لونه ايه؟

ج: ابيض ومخطط بالطول

س: انت تعرف زميلك ده منين ومين صحابكم؟

ج: اتعرفت عليه عن طريق واحده صحبتي

س: اسمها ايه؟ ومين تاني صحابكم.. وقابلتو مين فاليوم ده..؟

وهكذا.. وبعد ما ستف التحقيق تمام التمام وبقى فيه اكتر من 4 تهم.. في منتهى الهبل.. طلب مني اني استنى برة.. ونادى على زميلي

وبعد شوية لقيته بينادي عليا.. ومحضر ورقة تانية خالص معمول فيها قضية حظر تجول فقط. وحبس 15 يوم على ذمة التحقيقيات.. حتى تنعقد المحكمة.. بصراحة كنت متغاظ قوي لاني سمعت وانا ف العنبر ان حظر التجول بياخد اخلاء سبيل.. اشمعنى احنا

خدنا الصول عشان يرجعنا تاني الحوش اللي فيه الزنازين بتاعتنا.. واحنا ف الطريق كان بيعاملنا وحش بعد ماكان بيعاملنا حلو.. سألته فيه ايه.. قالي ده انتو وقعتوا سودا.. قولتله احنا ح نمشي من هنا امتى؟ قالي ح تمشوا اما نجيب زمايلكو اللي ف التحرير مكانكم.. ف ح نعوز نفضي السجن عشان نملاه بيهم..

استلمنا العسكري ماهر.. وفتشنا تفتيش ذاتي ظنناً منه انه ممكن يكون معانا فلوس خدناها من الامانات ف يقوم مقلبها وحاططها ف جيبه.. بس مع الاسف احنا ماخدناش غير بطايقنا عشان كانو بياخدوا منها البيانات ونسيوا يرجعوها مع الامانات

بمجرد ما زمايلنا ف الزنزانة سمعوا اننا خدنا 15 يوم على ذمة التحقيقات.. بدأ يحصل انقسامات ف الآراء وكلها كان الهدف منها تهدأتنا.. او تهدأتي انا بالتحديد

ف اليوم ده جات ناس جديدة.. لقيتني بسألهم السؤال اللي اتسألته اول ماجيت.. هو بيحصل ايه برة؟ والناس اللي ف التحرير مشيوا ولا لسه قاعدين؟.. طمنونا وقالولنا ان اللي ف التحرير زي ماهما ومبارك قاعد يقدم في تنازلات.. الحمد لله

كنا الاربعاء بالليل 9 فبراير.. نمت وانا فاقد الأمل اني اطلع من المكان ده.. بس كان عندي أمل اكبر ان مصر تتحرر.. بينا وبالناس الصامدة في التحرير

الخميس 10 فبراير..

صحينا ف اليوم ده لقينا العسكري ماهر اتغير وجه العسكري جمال.. وجمال ده كان ابيضاني ده بس كان لهجته بتقول انه فلاح.. ده لخصلنا شكل المعاملة وقال.. انه مش ح يشتم.. ولا ح يضرب بحاجه ولا يكهرب.. هو بس ح يضرب بإيده.. المهم كان شخص ثقيل وبالفعل ضرب واحد ضرب مبرح لمجرد انه تخطاه وسأل ضابط كان بيمر علينا.. سأله ح نخرج امتى من هنا..

اللي انقذنا منه ان مأمور السجن جه ومر علينا بعد الغداء.. ووزع علينا سجاير كل واحد سيجارتين.. انا قلت لزميلي حتى لو مش بتدخن لازم نحتفظ بالسجاير عشان دي العملة اللي ف السجن.. وممكن تدي لواحد سيجارة عشان يخدمك.. وطبعاً الزميل لم يفوت الفرصة وقالنا.. شايفين.. المعاملة اتغيرت خالص.. عشان انا موجود في وسطكم.. بصراحة الزميل ده كان بالنسبالي سجن جوه سجن.. العسكري جمال قلعنا الاحذية بتاعتنا.. وسائد قعد يتحايل عليه عشان يجيبهالنا تاني.. واليوم ده كان قميئ.. ما بين واحد يقول ح تخرجوا قريب.. ومابين واحد يقولنا انتوا وقعتكوا سودا.. قفلوا علينا ف اليوم ده بدري.. ومفيش شوية ومر دكتور من العيادة بيقول اللي عنده حاجه.. طلع سائد وقال ان معدته واجعاه.. وراح مع الدكتور واتقفل علينا الباب..

شوية وحوالي الساعة 7 مساءاً جه عسكري فتح الباب وقال اخرجو على برة..

مابقيناش فاهمين حاجه.. مش عارفين احنا رايحين فين واخرجوا على بره فين..

بالعافية لبست الجزمة فردة وفردة عشان كانوا بيزعقوا فينا بقوة ومالحقتش ادور على جزمتي..

خرجت من الزنازنة لقيت صف طويل من العساكر قاعد يضربنا على كتفنا ويزقونا للأمام.. واحنا مش فاهمين اللي بيحصل لدرجة اني انا والزميل وال 2 اللي معايا وسائد ما لقيناش بعض.. كان زحام شديد من البشر مشينا ف ممر طويل وعساكر عاليمين وعالشمال.. ف اللحظة دي حسيت ان فيه حاجه حصلت ف البلد.. واانا بجري ف الممر مع بقية زمايلي افتكرت كلام الصول اللي قالي انكو مش ماشيين من هنا غير اما زمايلكوا اللي ف التحرير ييجوا

لقيت نفسي واقف متسمر ف مكاني ومن غير ما احس لقتني بدمع وبتوسل لأحد العساكر يقولي فيه ايه.. راح قايلي بقرف.. ح تخرجوا.. قولتله فيه ايه ف التحرير؟ النس اللي ف التحرير لسه موجودين؟

ماردش عليا.. خرجت بسرعة عالممر لقيت حوش كبير وحوالية مباني دور واحد ملفوف دوران عالحوش.. وواقف عالمباني عساكر كتيرة وموجها اسلحتها ناحيتنا ف الحوش

قلت خلاص ح يصفونا.. لقيت عقيد واقف ينادي اسماء وطلبو مننا نقعد ف الارض.. ف اللحظة دي عرفت الاقي الزميل اللي كان معايا.. بعدها لقيت مروان وسائد وعائد.. وشاورنا لبعض.. عشان كنا بعيد عن بعض.. اسماء قاعدة تتنادى واحنا مش عارفيين احنا رايحين فين.. اللي بيتنادى اسمه بيقف ف صف وبيبتدي يتحرك لخارج الحوش ده..

كنا حوالي 3 آلاف شخص..

مش عارفين فيه ايه ولا ايه اللي بيحصل.؟؟ سألت الصول عمر فيه ايه؟ قالي ماتخافوش ح تخرجوا.. مافرحتش قوي لاني مكنتش جاي فسحة وح اخرج وقلت لنفسي ساعتها.. ح اخرج ليه وعلى حساب مين؟ ومين اللي ح يتحاسب عالأيام اللي شوفناها؟ ايه اللي حصل ف البلد؟؟

بالفعل اتنادى اسمي انا والزميل.. وف لحظتها شاورت لمروان وسائد وعدلي بإيديا مديلهم اشارة التليفون.. اللي المفروض اعمله زي ماوعدتهم لو خرجت قبلهم.. ومين عارف ممكن هما كمان يخرجوا معانا.. الغريبة بقى ان اسم عبد الله هاشم.. اللي كان قاتل 6 عساكر ومغتصب مهندسة زراعية وسارق سلاح.. اتنادى قبلنا! وخرج هو الآخر !.. خرجنا روحنا مكان تاني فيه عربيات جاهزة للخروج بينا من سور السجن الحربي بالهايكستب.. وهناك قابلنا الضابط أشرف سألته ايه اللي حصل.. لقيته بيرد عليا وهو بيهمس.. مبارك اتنحى.. وسافر دبي.. لقتني بقول بعلو الصوت.. الله أكبر.. لقيته بيقولي انت فرحان.. قولتله ده اسعد خبر ف حياتي.. ولقيت الزميل بيقوله انا بقالي 26 سنة مستني الخبر ده

قام مكشر ف وشنا وقايلنا.. ده انتوا بكرة تعرفوا قيمة الراجل ده.. ده انتوا ح تشوفوا ايام سودا.. الغريب ان ده كان نفس موقف كل افراد الجيش اللي قابلناهم ساعتها.. حتى صغار العساكر

المهم سألنا عن حاجتنا.. المحفظة.. الفلوس.. الموبايلات.. الكاميرا.. بقية الأمانات..؟

الضابط أشرف قالنا انها ف الأمانات وان الامانات قفلت دلوقتي واننا ننسى الحاجة دي لانها اتحرزت واتحفظت.. طب ايه مفيش ورقة حتى تثبت اننا خارجين من عندكم؟ ده احنا ح ندخل ف وقت حظر التجول وممكن يتقبض علينا بأشكالنا دي.. ده اللبس بقى مهبب وشعري ودقني يقولوا اني هربان م السجن.. اما لقانا ملحين قوي.. قام مطلعلنا 20 جنية من جيبة وقالنا.. ودي 20 جنية من جيبي الشخصي ( عرفنا بعد كده انها بتصرف لكل المفرج عنهم ) عشان ما تتبهدلوش وانتوا مروحين.. وماتقلقوش احنا مبلغين كل الدوريات اللي تبع الشرطة العسكرية اننا مخرجينكم.. روحوا كده لأمهاتهم خلوهم يطبخولكم أكله حلوة.. واقعدوا استرخوا ف بيتكم كام يوم كده ولا اسبوع.. واوعوا تقولوا لحد انتوا كنتوا فين..؟ مش من مصلحتكم تحكوا اي حاجه شفتوها هنا..

ما عجبنيش اسلوبه ولا طريقته.. ابتدينا نركب العربيات وقالنا ان العربية ح توصلنا لغاية موقف العاشر..

فؤجئنا ان العسكري اللي ف العربية بيردد نفس كلام الضابط أشرف.. روحوا ناموا اسبوع ف البيت.. خلي الحاجة تدبحلكوا دكرين بط.. كلوا واشربوا.. وانسوا أي حاجه شوفتوها هنا

العربية اللي احنا كنا فيها كان فيها حوالي 25 واحد.. كلهم كانو حافيين وبدون بطايق ماعدا انا وزميلي.. ف البطايق خدناها واحنا بيتحقق معانا قبلها يوم.. اما الجزم ف انا كنت لابس فردة وفردة وزميلي عرف يلاقي جزمته.. والباقي كانوا حافيين

حتى العسكري اللي كان بيسوق.. طلعنا على بوابة الهايكستب وقالنا موقف العاشر هناك اهو.. اتاري موقف العاشر باقي عليها مش اقل من 10 كيلو والقاهرة باقي عليها حوالي 25 كيلو

قررنا نتمشى.. كنا كتير جداً طالعين عالطريق وشكلنا كان مرعب.. حاولنا نتقسم مجاميع صغيرة.. بس قبل ما نتقسم انا كنت عاوز احفظهم رقم تليفوني عشان يتصلو بيا..

عشان نتجمع ونطالب بحقوقنا من الكفرة اللي كنا عندهم دول..

لكن لقيت الفكرة دي لاقت رفض شديد من الزميل وصاح فيا بصوت مسموع.. هو احنا لسه اطمنا على نفسنا الأول..!

احبطني .. وإن كنت.. كل شخص قبل تودعيه نصحته انه يحرك دعوة قضائية ضد اي حد قام بتعذيبه او احتجازة دون وجه حق.. ولقيت واحد بالفعل كان بيتردد على مركز النديم قبل القبض عليه وذكرلي انه ح يطلع من هنا على الاستاذه عايدة سيف الدولة.. المجموعة الصغيرة بتاعتنا كانت 9 اشخاص..

كلهم حافيين ماعدا انا والزميل.. والساعة كانت حوالي 9 مساءا ومفيش حد راضي يوقفلنا عالطريق

مشينا 2 كيلو ف اتجاه القاهرة.. لغاية ما عربية نقل بضايع كبيرة.. ضهرها كان فاضي.. ف وقفلنا وركبنا كلنا على ضهرها.. المجموعة بتاعتي وما تبقى من بقية المجموعات حوالي 80 شخص على ظهر عربية نقل بضائع كبيرة.. مشيت بينا حوالي 3 كيلو وقبل ما نوصل للشرطة العسكرية.. طلعلنا الراجل اللي جنب السواق قالنا معلهش يا جماعة مش ح اقدر ادخل عالشرطة العسكرية وانتو كده..

انزلوا خدوها مشي وبعد مانعدي الشرطة العسكرية تركبوا تاني.. الحقيقة الشرطة العسكرية لا كلمونا ولا لقينا اصلاً حد واقف عليها.. اللهم عسكري واحد واما شافنا بصلنا بإستغراب وما نطقش.. لكن فيه ناس معانا قعدوا يشرحوله اننا خارجين منين وكنا فين ورايحين فين.. مع انه ما سألش ! .. المهم

العربية تاهت مننا لأن كان فيه لفة غريبة وعشوائية ف الطريق الرايح والراجع.. قررنا نمشي.. لغاية ما ربنا يحلها من عنده.. واحنا ماشيين عدينا على مكان كده للشرطة عليه صورتين لحسني مبارك.. واحده يمين وواحده شمال.. عشان يشوفها اللي رايح واللي جاي.. تفيت عليها تفه كبيرة..

وقولت ياه لو املك اشيل الصورة دي بإيدي وادوس عليها بالجزمة.. فضلنا ماشيين لغاية ما وصلنا منطقة عسكرية وكانت على احدى نواصيها دبابة عليها عسكري.. كنا احنا ال 9..

العسكري من بعيد قالنا ارفعوا ايديكو وقربوا عليا.. ورفع علينا السلاح بتاعه وابتدى يعمره ف وشنا.. واحد مننا جه يتكلم قام العسكري متنطط وانبطح عالارض وخد وضع الضرب.. وقالنا اقعدوا ف الارض وارفعوا ايديكوا لفوق والا ح اضرب

قعدنا ف الارض وكان فيه قريب مننا كابينه مراقبة وواحد تاني مراقبنا من فوق.. وبصراحة انا ماقدرتش امسك نفسي قمت اتكلمت بكل غضب.. فيه ايه؟ قلت اقعدوا وقعدنا.. ح تسمعنا بقى ولا ح تفضل مزنبنا كده كتير؟

قام بتاع الكابينة سمعني وطلب مني اني اسكت.. ماسكتش وقمت ملخصله الموضوع ف سطر.. احنا كنا ف السجن الحربي وافرج عننا وما سلموناش اي متعلقات لينا.. وقالولنا ح يبلغوا الشرطة العسكرية ف الطريق وتقدر تكلمهم تتأكد منهم

قالي طيب خليكو زي مانتو وانا جايلكم.. والواد العسكري لسه واخد وضع الضرب.. ماقدرتش امسك نفسي من الضحك على طريقته.. ايه ياعم انت داخل حرب ولا حاجه؟ ولا حد قالك اننا اسرائيليين؟

شوية وجالنا عميد وضابط شاب بلبس جيش معلق مسدس بأستك ف بنطلونه.. وضابط تاني بلبس مدني.. كلنا اتكلمنا ف وقت واحد.. ف قام واحد مننا كان مسافر بني سويف وقال انه كان واخد ورقة منهم تفيد انه كان ف السجن الحربي وخرج.. عشان يبقى يطلعها في ظل الظروف الصعبة للسفر بين المحافظات وبعضها.. على بطاقتي وبطاقة الزميل.. ابتدوا ياخدوا الموضوع جد وسمعوا مننا واحد واحد.. وفضلوا مزنبينا بنفس الطريقة.. وقام العميد قالي يعني سابوكوا كده مامعاكمش اي فلوس ولا اي حاجه تثبت شخصيتكم.. قمت مقرب م العميد وقايله.. الضابط أشرف ادالي 20 جنية انا وزميلي عشان نروح بيها.. قالي اشمعنى انتوا.. بصيت لبقية ال 9 وسكت.. قام ضاحك وقال.. عشان شكلكوا محترمين.. روحت منفجر فيه بقى.. وقولتله كل الناس اللي كانت ف السجن الحربي محترمين وولاد ناس ولا يقلو عننا شيء.. ركننا شوية بقى وقام راح بالعربية على مدخل المنطقة العسكرية اللي كنا على سورها.. واحنا خدناها مشي ف حماية حضرة الضابط الشاب اللي معلق المسدس بأستك وقاعد يتنطط طول الطريق وكأنه ماسك يهود او كأننا ممكن نهرب ف أم الصحرا اللي كنا فيها دي

شوية وجالنا العميد ده وبص للضابط الشاب وقاله.. طلع الكلام صحيح.. اعملنا كمين ف الطريق عشان نوقفلهم اي ميكروباص ياخدهم يوديهم اي حته قريبه يركبوا منها عشان ما يتقبضش عليهم تاني

عملوا كمين ووقفوا الطريق لمدة حوالي تلت ساعة وما عداش اي ميكروباص.. وكل العربيات اللي كانت بتعدي يا نقل كبيرة محملة.. يا ملاكي.. لغاية ماعدت عربية محملة اقفاص فاضية.. قام العميد منادي عالضابط الشاب وقاله وقف ده.. وقام قاله إنت رايح فين.. قاله رايح لغاية البحر الاعظم ف الجيزة.. قاله طيب خد دول ف طريقك.. وطبعاً صاحب العربية ما رضيش يركب حد قدام معاه.. وركبنا كلنا على ظهر الاقفاص الفاضية.. على مدار ساعتين كانوا مدة طول الطريق.. والهوا بيخبط فينا لدرجة اننا تلجنا وكنا ماسكين ف بعض والعربية ماشية بكامل سرعتها لغاية ما وصلنا شارع البحر الأعظم بالجيزة.. هناك خدنا تاكسي

واحنا ف التاكسي بقى كنا على موعد مع سماع خطاب مبارك الأخير..واللي اتفاجئنا فيه انه لسه موجود ولا سافر دبي زي ما قالنا حضرة الضابط أشرف.. ولا اتنيل اتنحى.. امال ايه اللي قالهولنا حضرة الضابط أشرف ده؟؟ جايز يكون مجرد كلام.. لكن كنت حاسس ان نهاية مبارك قربت..!

Egypt 25 January 2011 LIVE NOW !

2011-01-24T16:31:00.001-08:00

Live streaming from Cairo and Alexandria !

فيلم بحق وحقيقي!!

2010-01-21T13:14:00.000-08:00

النهاردة في شارع السودان شفت موقف غريب ومش غريب في نفس الوقت

شفت ناس قاعدة تزق ف اتوبيس نقل عام زي المشهد اللي في الاعلان المسروق بتاع اليوم السابع اللي عملته المُخرجة اللي بحبها وبحترمها ساندرا ومع انه متاخد من الاعلان الهندي ده الا ان مش دي القضية دلوقتي وهو اول مرة يعني نسرق

المهم
اللي حصل اني فجأة لقيت ف الشارع اتوبيس نقل عام كبير ( اللي كانو يقصدو بيه مصر ) شفت ناس حقيقي قاعدة تزق الاتوبيس - ماصدقتش وقعدت ابص يمين وشمال ادور عالكاميرات اللي بتصور الاعلان او الفيلم ده ومالقتش

طلع حقيقي.....!!

نسيت المشوار اللي كنت رايحه وقعدت اتفرج وانا فرحان ومستمتع بالمشهد اللي بحق وحقيقي ده.. ناس مختلفة الاشكال بتزق ف اتوبيس نقل عام عطلان والاتوبيس قاعد يمشي تاته تاته وانا لسه مبتهج بدون سبب واضح

والناس بتزق وفرحانه هي كمان ومش تعبانين

مافرحتش كتير لانه سرعان ما لقيت الاتوبيس وقف

جريت ابص عالناس اللي بتزق وراه
لقيتهم موجودين

ومش تعبانين

ومستعدين يذقو بكل قوتهم

لكن

الطريق قدام الاتوبيس كان واقف

وتقولي 2010 سنة سعيدة؟!!

2010-01-03T05:03:00.000-08:00

تعيين الجنرال أحمد زكي بدر

وزيراً للتعليم بمصر!! اكيد كان القرار واخدينه من بدري ويقدرو يصدروه في نهاية السنة الشؤم 2009

لكنهم عاوزين يأكدوا ( وينكدوا ) دوماً علينا ويقولولنا ( احنا وراكو وراكو ياولاد

الو... ) وزي ما لغو برضو حفلة منير ليلة رأس السنة على ارض الاوبرا عشان يقوللنا انهم موجودين وان فيه قوة ( بنت ...... ) اقوى مننا ( الشعب ) على ارض مصر المحروسة موجوده ومسيطره.. وهتروحوا مننا فين ياولاد ال... ) وانه 2010 - او حتى 2050 احنا موجودين موجودين وفوقوا واصحوا واعوا تحلمو بسنة سعيدة

جديدة على ارض العزبة بتاعتنا

--------------------------------------------------------------------

دي خلفية تاريخية عن العضو الجديد في الحكومة القديمة اللي بتحكمنا

قبل انتهاء العام الدراسي 2006/2007 صدر قرار جمهوري بتعيين " الدكتور أحمد زكي بدر رئيساً لجامعة عين شمس بالرغم من وجود من هم أقدم منه ويسبقونه في السلك الاكاديمي ولكن توجد معايير اخري لاختيار رئيس الجامعة ويكفي أن نعرف أن الرجل عين رئيس للجامعة بعد ستة اشهر فقط من شغله منصب نائب رئيسا الجامعة خلفاً للدكتور علي العبد.

أحمد زكي بدر لمن لا يعرفه هو ابن وزير الداخلية الاسبق زكي بدر الذي اقيل بسبب لسانه واشتهر بلقب (الوزير الشتام) وذلك في عهد وزارة الدكتور عاطف صدقي.

نشأ الدكتور احمد زكي بدر متأثرا بوالده وبالحس الامني الذي زرع بداخله خلال معالجة الامور وتعامله مع الطلبة داخل الحرم الجامعي.. زيارة واحدة الي جامعة عين شمس تستطيع من خلالها أن تكتشف حجم التواجد الامني داخل الجامعة فقد قام رئيس الجامعة بزيادة اعداد رجال الامن الذين تم تزويدهم بأجهزة لاسلكي لإبلاغه بكل شيء كما تم استقطاب مجموعة من طلاب الجامعة لمعرفة ما يجري بين الطلبة، كما قام الدكتور احمد بحركة تنقلات واسعة بين العاملين في الشئون الادارية علي مستوي الجامعة طالت هذه التنقلات السعاة وحرس الجامعة ووضع في كل مكان بعض رجاله الذين يثق بهم لابلاغه بكل ما يحدث، تستطيع ان تقول إن الدكتور أحمد حوّل الجامعة لمقر امني واعتبر نفسه مسئولا امنيا وليس استاذا جامعيا.

قبل بداية العام الجامعي تم استدعاء مجموعة من الطلبة لمقرات أمن الدولة لتحذيرهم بعدم تكرار ما حدث في العام الماضي من احداث شغب بين طلاب الاتحاد الحر وبين بعض البلطجية الذين فتح لهم الامن ابواب الجامعة للاعتداء علي الطلاب اكتشف بعد ذلك انهم بلطجية تم استئجارهم وأن بعضهم يتلقي مبالغ مالية كإعانة من الجامعة حدثت وقتها مشادات كلامية بين الدكتور احمد زكي بدر والطلبة واساتذة الجامعة واتهموه بأنه تدخل لمنع مظاهرات الطلاب وأنه هو المحرك لأعمال الشغب التي حدثت. هذه الواقعة كانت اختبارا حقيقيا للدكتور احمد الذي بدأ وقتها في السيطرة علي اوضاع الجامعة الامنية واستكشاف معالمها.. ومع بداية العام الدراسي قام الدكتور احمد بدعوة وزير التعليم العالي الدكتور هاني هلال لتفقد سير العملية التعليمة وأثناء تفقد الوزير الجامعة فوجئ بسيدة تلح عليه وتطالبه بإنهاء مشكلة ابنتها والحاقها بإحدي كليات الجامعة بعد ان فقدت بعض أوراق اجاباتها في الثانوية العامة استشعر الوزير بالحرج وكأن الارض انشقت لتخرج له هذه السيدة.. قال بطريقة حادة وقد بدا عليه الغضب موجها كلامه للسيدة : (افرشي الملاية واعملي اعتصام في الجامعة)، اصرت السيدة علي طلبها بإنهاء أزمة ابنتها ولحقت بالوزير فما كان من الدكتور احمد زكي بدر سوي ان امسك بالميكروفون ووجه كلامه لطلاب الجامعة بطريقة تحريضية قائلا: «يا طلاب جامعة عين شمس يوجد بينكم أغراب ماذا ستفعلون»؟ بالطبع لم يتحرك الطلاب لعمل اي تصرف ضد سيدة جاءت للبحث عن حق ومستقبل ابنتها ولكن كانت هناك يد تحركت بعيداً عن كاميرات الصحفين التي انتشرت لمتابعة زيارة الوزير تأمر رجال الامن باخراج السيدة خارج الجامعة وبالفعل قامت مجموعة من حرس الوزير الخاص بقذف السيدة خارج الجامعة بطريقة اثارت الطلبة وامام مرأي ومسمع وزير التعليم العالي.

تولي الدكتور احمد زكي بدر عدة مناصب بعد حصوله علي الدكتوراة في الهندسة من الخارج في عام 1997، عين رائدا لاتحاد طلاب كلية الهندسة لمدة ثلاث سنوات استطاع وقتها السيطرة علي الجامعة امنياً كان يتلقي التعليمات من الامن من خلال هاتفه المحمول ويقوم باستدعاء الامن للقبض علي الطلبة كانت كل تحركاته داخل الجامعة بصحبة رئيس حرس الكلية، قيد النشاط الطلابي كما ذكر لنا الطلبة الذين عاصروه واشتهر بعنفه مع الطلاب واساتذة الجامعة، استطاع السيطرة علي كل الانشطة داخل الجامعة كان لا يتم اي نشاط طلابي الا بعد موافقته عليه.

طلاب كلية الهندسة بالرغم من مرور 10سنوات علي تخرجهم في الجامعة الا انهم لايزالون يذكرون الطريقة التي تعامل بها معهم عرف عنه بين الطلاب انه لا توجد لديه خطوط حمراء في التعامل كان دائم العنف مع الطلبة يرفض اي حوار معهم ودائماً يتهمهم بالكذب بل انه كما قال لنا مجموعة من الطلبة اجهض النشاط الطلابي.

كانت اولي قراراته هي شطب كل الاسر الموجودة في الكلية وفي العام الثاني اصر علي تغيير اسم الاسر حتي لا يكون لها معني او مدلول سياسي من ضمن هذه الأسر اسرة اسمها «الشموع» وهي من اقدم الاسر في الكلية تم تغيير اسمها الي «اسرة الشموس».

حاول استقطاب بعض الطلبة للعمل مع الامن منهم طالب يدعي أ.س تعامل مع الامن بطريقة جيدة ونال رضا الدكتور احمد وحصل علي عدة امتيازات داخل الجامعة.. منع الدكتور احمد اي نشاط في الكلية الا بعد موافقته عليه بالرغم من تدخل بعض الدكاترة لديه للتوسط بينه وبين الطلبة مما ادي لعدة مشادات بينه وبين أساتذة الجامعي.. اشهر هذه الوقائع عندما تقدم الطلاب اليه بعرض مسرحية تسمي «بولتر مان في كوكب الارض» اصر علي قراءتها ورفض عرضها فقام الطلبة بتعديلها اكثر من مرة وفي النهاية تدخل دكتور في الجامعة يدعي اسامة عبد المهيمن للتوسط بينه وبين الطلبة ولكن دون فائدة بل تحدث مع زميله بطريقة غير لائقة مما دفع الدكتور عبد المهيمن إلي عرض المسرحية في مسرح الجامعة واثناء العرض تمت محاصرة المسرح وتحويل كل الطلاب المشاركين للتحقيق.

وعندما قام طلاب الكلية بحفل استقبال للطلبة الجدد تشاجر معهم وتعامل معهم بقسوة وسألهم من تكونون انتم واستدعي الامن لانهاء حفل الاستقبال.

احد طلاب الكلية يدعي محمد الحديدي حاصل علي المركز الثالث في الشعر توجه الي مكتبه ومعه قصيدة شعرية للموافقة عليها قبل نشرها في ممر الصحافة اتهمه بأنه يشتم الحكومة أصيب الطالب بالهلع حتي انه كسر لوحا زجاجيا اثناء تراجعه للخلف مما اثار الدكتور احمد الذي طالبه بدفع قيمة الزجاج المكسور اما الطالب فقد توقف عن سرد الشعر اما طلبة الاتحاد فلم يكن ينفذ لهم اي طلب فقد فوجئ ثلاثة طلاب من رموز العمل الطلابي داخل الكلية بقرار فصل من الجامعة بدون تحقيق معهم علق علي كل مداخل الكلية ومنعوا من دخول الجامعة قبل الانتخابات الطلابية دخل الدكتور احمد في صراع مع الطلاب ويذكر انه الغي نتيجة الانتخابات الطلابية.. في إحدي السنوات مما دفع الطلاب الفائزين لرفع قضية ضد الجامعة. تنبأ الجميع للدكتور احمد في ذلك الوقت ان يكون اصغر رئيس جامعة ولكنه سافر للخارج للحصول علي الدكتوراة وبعد عودته تولي رئاسة اكاديمية اخبار اليوم في 6 أكتوبر ومارس وقتها نفس تصرفاته استمرت رئاسته للأكاديمة لمدة ثلاث سنوات بعدها عين نائب رئيس جامعة عين شمس وحدثت احداث عنف هي الاولي من نوعها بعد دخول مجموعة من البلطجية الي الجامعة بعد اقل من ستة اشهر عين رئيساً للجامعة أثناء احداث العنف التي جرت داخل الجامعة توجهنا الي الجامعة لتغطية ما حدث احد طلاب الاتحاد من كلية العلوم كان يتحدث معنا.. عن اسباب ما حدث وكانت «الفجر» قد نشرت وقائع ما جري داخل الجامعة والاتهامات التي وجهت وقتها لرئيس الجامعة بانه هو المحرك لهذه الاحداث وبعد ساعة تقريباً من حديثي مع طالب الاتحاد فوجئت بحديثه في المحمول مع رائد اتحاد الطلبة الذي اتصل بالدكتور احمد زكي بدر نائب رئيس الجامعة وقتها الذي اعطي التعليمات باخراجي من الجامعة واستدعاء الأمن جزاء لما نشرته «الفجر» وقتها. وهذا يدل علي أن الدكتور احمد قد ربط الجامعة بشبكة من الاتصالات وجند مجموعة من

طلاب الاتحاد لنقل كل ما يحدث إليه

!مش لاقي تاكل؟... إسرق

2009-12-24T17:31:00.000-08:00

مش لاقي تاكل؟... إسرق!

جملة قلتها بكل تلقائية لشاب مراهق كان بيتسول امام احدى محطات المترو.. مش عارف ايه اللي خلاني اقوله كده مع ان الاخ الملتحي اللي كان جنبي اما الولد سأله على فلوس عشان يسد جوعه.. فقام قاله بكل ثقة : اشتغل يابني.. اتعلملك صنعه.. عيب انت مش صغير.. وربنا عاطيلك صحه..

لقيت نفسي اما الدور جه عليا.. وردد السؤال عليا.. كان ردي بكل ثقة ايضاً.. مش لاقي تاكل؟.. إسرق!

يمكن عشان انا ف لحظات حطيت نفسي مكانه.. وليه احط نفسي مكانه.. مانا ساعات بتيجي عليا وقت بالفعل ببقى مكانه.. مش انا وبس ده معظم الشعب المصري اللي حيران ف النص بين الطبقة الغنية والطبقة الفقيرة ده غير اللي تحت خط الفقر.! اتعود انه يشتغل اليوم بيوم عشان يتعشى آخر اليوم.. لدرجه انه لو بطل يوم او تعب او حتى جاله ظرف طارق او فرح!! مايقدرش يبطل من الشغل عشان بيكسب قوته يوم بيوم.. نفس الشعب المصري ده هو اللي طلع يجري على مكاتب الضرائب اول ما طلعوا قانون الضرائب العقارية.. بدل ما حتى ما يدي لنفسه فرصة صغيرة يفكر في مدى دستورية القانون ده من عدمه.. وصلنا اننا بقينا كلنا مقتنعين انه لو عاوزين نبقى اغنياء لازم نبقى حراميه.. ولو مابقيناش حراميه ف نقعد ف بيوتنا نعبد ربنا ونعيش باللي قسموهلنا!؟.. وبالتالي اي حد مش لاقي تاكل؟ ف هو اكيد هيبات من غير عشا.. واكيد مش لاقي ياكل عشان مالقاش شغل!.. يبقى الاكيد انه عشان ياكل.. لازم يسرق!

اُنعيك يا من وهبت حياتك للفن

2008-07-27T12:32:00.000-07:00

اُنعيك يا من وهبت حياتك للفن .. ستظل ذكراك خالدة إلى يوم البعث .. وسبحان من له الدوام

---------------------------------------------------------------------------------

وفاة الفنان يوسف شاهين

توفى الاحد عن 82 عاما المخرج المصرى العالمى يوسف شاهين بمستشفى المعادى للقوات المسلحة بالقاهرة التى نقل اليها بعد اجراء جراحة مؤخرا فى فرنسا نتيجة لاصابته بنزيف دموى بالمخ . وقد ولد يوسف شاهين في 25 يناير 1926 ونشأ بمدينة الإسكندرية وكمعظم الأسر التي عاشت في الإسكندرية في تلك الفترة فقد كان هناك خمسة لغات يتم التحدث بها في بيت يوسف شاهين . وعلى الرغم من انتمائه للطبقة المتوسطة كانت دراسته بمدارس خاصة منها مدرسة "كلية فيكتوريا" حتى حصل على الشهادة الثانوية. بعد سنة في جامعة الإسكندرية، انتقل إلى الولايات المتحدة وأمضى سنتين في دار "پاسادينا" المسرحي يدرس صناعة الأفلام والفنون الدرامية.عبر يوسف شاهين من خلال أفلامه عن مواقفه السياسية فقد كان ضد الإرهاب، والإسلاميين المتطرفين. بعد رجوع شاهين إلى مصر، ساعده المصور السينمائي "أل?يز أورفانيللي" بالدخول في العمل بصناعة الأفلام وكان أول فيلم له هو بابا أمين (1950). وبعد عام واحد شارك فيلمه ابن النيل (1951) في مهرجان أفلام كان. في عام 1970 حصل على الجائزة الذهبية من مهرجان قرطاچ وحصل على جائزة الدب الفضي في برلين عن فيلمه إسكندرية ليه؟ (1978)، وهو الفيلم الأول من أربعة تروي عن حياته الشخصية، الأفلام الثلاثة الأخرى هي حدوتة مصرية (1982)، إسكندرية كمان وكمان (1990) وإسكندرية - نيويورك (2004

في عام 1992 عرض عليه "چاك لاسال" أن يعرض مسرحية من اختياره ل- كوميدي فرانسيز وقد أختار شاهين أن يعرض مسرحية "كاليجولا لألبير كامو" والتي نجحت نجاحًا ساحقـًا. وفي ذات العام بدأ بكتابة فيلم المهاجر (1994) وتمنى شاهين دائمًا صنع هذا العمل وقد تحققت أمنيته في 1994. وظهر شاهين كممثل في عدد من الأفلام التي أخرجها مثل باب الحديد و إسكندرية كمان و كمان.
في 1997 وبعد 46 عامًا و5 دعوات سابقة، حصل على جائزة اليوبيل الذهبي من مهرجان كان في عيده الـ 50 عن فيلمه المصير (1997)، منح مرتبة ضابط في لجنة الشرف من قبل فرنسا في 2006. وقد أُصيب يوسف شاهين بنزيف متكرر بالمخ، مساء يوم 15 يونيو 2008 ، ودخل يوسف شاهين في 16 يونيو 2008 في غيبوبة فجر ذلك اليوم إثر نزيف في الدماغ وأدخل إلى مستشفى الشروق بالقاهرة. ونقلت وكالة أنباء الشرق الأوسط عن الأطباء أن المخرج، البالغ من العمر 82 عاماً، يرقد في غيبوبة كاملة، وحالته"خطرة" .
طالب خالد يوسف الذي أخرج مع شاهين فيلم "هي فوضى" باستئجار طائرة خاصة لنقل شاهين إلى "فرنسا أو بريطانيا" لتلقي العلاج. واشارت الوكالة إلى أن خالد يوسف أكد، نقلا عن الأطباء، ان حالة يوسف شاهين تتطلب نقله إلى الخارج. وأضاف ان اتصالات تجرى لوصول هذه الطائرة ولكنه لم يعط المزيد من الإيضاحات، و لاحقا في ذلك اليوم نقل شاهين علي متن طائرة إسعافات ألمانية خاصة إلي باريس حيث تم إدخاله إلي المستشفي الأمريكي بالعاصمة الفرنسية .
يعرف عن شاهين معارضته للرقابة و التطرف و كذلك للحكومة المصرية و للإسلاميين، فيقول شاهين الذي يعتبر نفسه جزءا من جيل الليبراليين المصريين انه مازال يكافح ضد الرقابة المحافظة سواء من جانب الدولة او المجتمع .

ستظل ذكراك خالدة إلى يوم البعث .. وسبحان من له الدوام

انسان وانسان

2008-06-27T10:47:00.000-07:00

الولد الصغير ده .. انسان مُسلم

والشاب اللي جنبه ده .. انسان مسيحي

الولد الصغير ده عنده اعاقة معينة في ايديه ونظرة .. وكان قاعد في المترو يقرأ قرآن بصوت عالي

وبصراحة المسيحي اللي جنبه ده كان مخنوق قوي وباين عليه .. لانه كان بيزعق في ودنه

مش هو بس .. اعتقد ان ناس كتيرة مسيحيين كانو او مسلمين ازعجها صوت هذا الصغير

لدرجة اني سألت روحي سؤال

عمرنا شوفنا حد مسيحي قرأ الانجيل بتاعه في الاتوبيس ؟ او في المترو ؟

او سمعنا عن حد مسيحي قام يوعظ الناس في المواصلات العامة ؟

انا مش ضد قراءة القرآن في المواصلات

لكن ليه ما نحافظش على حرية الآخر

ونقرأ في سرنا .. او بصوت واطي

شوفو بقى الانسان ماسك ف ايدين اخوه الانسان ازاي عشان يساعده انه يخرج

فلنأخذ صورة تذكارية

2008-01-20T22:51:00.000-08:00

بعد مشاركة فيلمي " يوتوبيا " في مهرجان الاسكندرية السينمائي الدولي ( سبتمبر 2007 )

شارك في مهرجان بغداد الدولي للافلام القصيرة والتسجيلية - ديسمبر 2007

وبعد العروض التي اقيمت في اكثر من مكان فني وثقافي بمصر وخارجها وعرض الفيلم بها في عام 2007

تتوالى العروض التي سوف يشارك في تنظيم بعضها فريقنا ( ون شوت ) بالاضافة الى عروض اخرى في مهرجانات سينمائية متخصصة كـ مهرجان ساقية الصاوي في فبراير والمهرجان القومي للسينما المصرية في ابريل 2008

ها هو اول عرض لـ يوتوبيا في 2008 ومعه سوف اعرض فيلمي الروائي القصير الذي انتهيت منه بعد يوتوبيا .. بعنوان : لقمة عيش

المكان : قصر السينما - مصر

بجاردن سيتي - متفرع من ش القصر العيني - بجاور سفارة السعودية

الزمان : الخميس 24 / 1 / 2008 ( اول ايام اجازة نصف العام ) الساعة السادسة والنصف

الشعار : فلنأخذ صورة تذكارية

( تضم كل الحضور )

الدعوة عامة

لقمة عيش

روائي قصير

4 دقائق

تمثيل

مدحت شاكر

سيناريو واخراج

سمير عِشرة

" يوتوبيا "

تمثيل

محمد كرارة

اسامة مصطفى

فارس الصغير

اعداد موسيقى : احمد سكارنو

ترجمة : ايمان عبدالعظيم

مونتاج ومكساج : طارق عزت

مساعد مُخرج : محمود صابر
اخراج : سمير عِشرة

تقرير OTV
عن الفيلم
http://www.youtube.com/watch?v=0dufEO0zzlI
استضافتي في الفيلم التسجيلي ( السينما المصرية في مائة عام ) على قناة الجزيرة الاخبارية
http://www.youtube.com/watch?v=4MJ1J7nleVI

انتظرونا .. فلدينا المزيد

خالص تحياتي

سمسم

صور مهرجان اسكندرية

2007-09-25T18:17:00.000-07:00

تغطية بالصور لرحلة فريق ون شوت في الاسكندرية .. حيث مهرجان اسكندرية السينمائي ال 23 .. وعرض فيلم " يوتوبيا " في المهرجان

------------------------------------------------------------------------------

في السينما اثناء العروض محمود صابر واجمل ابتسامة لأجمد نجاح

من اليسار . سمير - الممثل التونسي لطفي العبدلي - اسامة مصطفى

مع الناقد طارق الشناوي

اسامة مصطفى مع الناقد طارق الشناوي

مع الفنان القدير عمر الحريري

لا تعليق

اسامة مصطفى - محمد يوسف
مع الصحفية والمخرجة الفرنسية فلورانس كولومباني
مع الصحفية رشا جودت
مع المخرج التونسي الجميل نوري بوزيد ( مُخرج فيلم : آخر فيلم ) ء

مع المُخرجة الشابة داليا الرشيدي

مع الفنان الكبير اسامة مصطفى
صورة لمحمد كرارة قدام محطة مصر بالاسكندرية
عن قرب :$
عن بعد شوية :d

صورة جماعية للمخرجين الشباب من اليسار - سمير - يوسف هشام - فريد نصر - احمد خالد - يافا جويلي - عمرو سلامة - اسامة مصطفى مع الاستاذ نادر عادلي والمُخرجة يافا جويلي
من اليسار - فريد نصر - أ / نادر عدلي - اسامة مصطفى - محمد كرارة
بالمركز الثقافي الفرنسي بالاسكندرية

من اليسار - سمير - المُخرج محمد حماد - الكاتب فريد نصر - المُخرج احمد خالد

اسامة ونظرة للكاميرا

اسامة وكرارة عالقهوة - وحنان الام

كرارة ف الثقافي الفرنسي

عالقهوة بعد عرض يوتوبيا

عالقهوة كنت ب وري اسامة اسمة :d
اسامة ببكلم لفريد واحمد ابوسمرة صديق المدرسة ساند عالحيط واسلام شعلة مدينا ظهره وكرارة كان نايم وانا كنت بشرب زبادي
مش فاكر اهمية الحوار اللي كنت بقوله ف الوقت ده :d
نايم وفريد بيصحيني وكرارة كان عاوز يقوم ينام واسامة لسه بيتفرج على اسمة ف كتالوج المهرجان واحمد ابو سمرة شكلة اتخنق من القعدة

كنا بنشوف تاكسي رايح منطقة الرصافة ف محرم بك ، ومحدش يسألني ليه :$

كرارة واسامة وفريد بيشوفو تاكسي - كنا مقسمين نفسنا :d
ايه اللي جاب الصورة دي هنا :$ ؟
من اليسار - اسامة مصطفى - كرارة ميدنا ظهرة - احمد ابو سمرة - اسلام شعلة

من اليسار - اسلام شعلة - سمير - كرارة - صلاح صديقنا الاسكندراني الجدع

من اليسار ( قبل ما التاكسي يقف ) - المخرج ( وصديقي ) باسم التركي - سمير - باسم صحبي - فريد نصر - احمد ابو سمرة - اسامة مصطفى ( بتبص فين يا اسامة؟ ) وتحت قاعد كرارة وصديقه اللدود اسلام شعلة
بنقسم نفسنا مجاميع عشان نوقف اي تاكسي
وشوشة بيني وكرارة واسامة

إلى اللقاء في مناسبات اخرى قادمة

تابعونا .. لدينا المزيد

خالص تحياتي

سمسم

فيلم " يوتوبيا " لـ سمير عِشرة ( اللي هو انا ) في مهرجان الاسكندرية السينمائي الدولي .. مسابقة الافلام الديجيتال

2007-08-31T10:07:00.000-07:00

فيلم " يوتوبيا " يعرض في مهرجان الاسكندرية السينمائي الدولي .. مسابقة الافلام الديجيتال

يوم السبت 8/9 /2007 بالمركز الثقافي الفرنسي بالاسكندرية في تمام الساعة الخامسة مساءا - بالتوقيت الجديد -

والدعوة لجميع اصدقائي وحبايبهم الحلوين - الوحشين لأ
يشرفني حضوركم

خالص تحياتي

سمسم

---------------------------------------------------------------------------
" يوتوبيا "
مدة العرض : 7 دقائق

تمثيل
محمد كرارة
اسامة مصطفى
فارس الصغير
اعداد موسيقى : احمد سكارنو
مونتاج ومكساج : طارق عزت

ترجمة : ايمان عبد العظيم

افيش : مروة الخولي

مدير الانتاج : هاني عِشرة

اضاءة : محمد شحاتة

تصوير : سمير عِشرة

محمود صابر

بيومي ربيع
مساعد مُخرج : محمود صابر

قصة وسيناريو : سمير عِشرة

حوار : فارس الصغير

اخراج : سمير عِشرة

2007-08-31T09:01:00.000-07:00

فيلمي " يوتوبيا " سوف يعرض في مهرجان الاسكندرية السينمائي الدولي .. مسابقة الافلام الديجيتال .. يوم السبت 8/9 /2007 بالمركز الثقافي الفرنسي بالاسكندرية في تمام الساعة الخامسة مساءا .. والدعوة لجميع اصدقائي وحبايبهم .. خالص تحياتي سمير عِشرة

2007-08-20T07:22:00.000-07:00

2007-08-19T18:21:00.000-07:00

صور لمترو الانفاق
تصوير ايديا وحياة عينيا
مش عارف انا صورتها ليه
واضح ان البلوج هيتخصص في الصور
تصورت ان حياتها دي كلها عبارة عن قطار مترو ماشي كده
شوفو ومستني رأيكم كلكم كلكم

" قصة حب "

2007-08-03T10:03:00.000-07:00

" قصة حب "

2007-08-03T09:41:00.000-07:00

" قصة حب "

كان يومُ عادي مثل بقية الايام في احد الشهور الصيفية .. كنت اجلس بجوار الشاطىء اتأمل في النساء والرجال وهم يلعبون ويمرحون وبدأت في تذكر مغامراتي وعلاقاتي النسائية الكثيرة والتي كادت ان تقتلني في يوم من الايام .. وكيف كنت كل يوم اقع في حب جديد يزول مع نهاية اليوم .. وكيف كان مستقبلي غير محدد الملامح بعد ، دائماً كنت اذهب إلى البحر لأرى الكون من خلاله وارى مشهد الغروب امامي ليذكرني بأن دنيانا التي نعيشها ماهي إلا مشهدين شروق وغروب بينهما لحظة صغيرة من الزمن.
حتى مرت من جانبي هذه الفتاة الجميلة والتي لم ارى في حياتي اجمل منها .. كان وجهها يحمل كل علامات البراءة ، وعيناها ذات اللون العسلي تشبه اللؤلؤ الذي يسحر كل من ينظر إليه ، انها في مثل عمري تقريباً ، كانت متوسطة الطول ورشيقة القوام .. نظرت إلي وانا اتابع خطواتها في انجذاب تام وعندها رأيت اجمل ابتسامة بين شفتيها ..
لم اتذكر من منا بدأ بالكلام ، لكن الاهم اننا ظللنا نتحدث طوال اليوم وحتى غروب الشمس
في البداية حدثتني عن اصدقائها ودراستها وعائلتها الصغيرة وحدثتها انا ايضاً عن عائلتي الصغيرة وعن دراستي واصدقائي واهتمامتي انا ايضاً .. والمدهش هو التشابهه الكبير في اهتمامتنا واحلامنا حيث انني اخبرتها عن موهبتي في كتابه الشعر والقصص وهي ايضاً كانت تريد ان تصبح اعلامية كبيرة بحكم دراستها ..
تشابه كلامنا ووصفنا لاحلامنا ومشاعرنا واحزاننا وحتى الاماكن المفضلة التي نشعر فيها بالسكون والاستجمام
واخذت اقلب معها كل المواضيع التي جائت في خاطري في هذا الوقت ، كانت جميلة في كل شيء وبريئة براءه الاطفال ، تتمتع بذكاء عالي يوازي جمال وجهها ، حدثتها عن علاقاتي الكثيرة بالبنات الاخريات وكم كانت اكبر علاقة لا تستمر اكثر من اسبوع واحد ، وعندما سمعتني اتحدث عن علاقاتي السابقة ،بدأت تتحدث بأسلوب مختلف ، حدثتني عن شباب كثيرين اعجبو بها وكان حلم بعضهم الارتباط بها ولكنا لم تكن تُعجب بأي شاب ، فكانت لديها مواصفات معينة لفارس احلامها .. ربما تطابقت بعض هذه المواصفات مع هذا الشاب الاخير التي حدثتني عنه وكيف كان مُغرم ومُعجب بها لدرجة انه كان يدفع الكثير من الاموال والوقت لكي يحاول الاتصال بها وسماع صوتها والبوح لها عن ما بداخله لها ، وكيف كان هذا الشاب حسن الاخلاق وجذاب المظهر ومؤدب في التعامل معها ، ولكنها اكتشفت مع الوقت انه متزوج ولديه طفل وعلى خلاف مع زوجته ، فقررت هي الاصلاح بينهم حتى تكسب هذا الثواب حيث انه كان من المستحيل ان يوافق اهلها على ارتباط بشاب كان متزوج ولديه طفل ، لم يطول الحديث كثيراً عن هذا الشاب حيث كان الوقت قد تأخر وقررت هي الرحيل مع اعطائي وعد لمقابلتها في اليوم التالي في نفس المكان على الشاطىء.
كان ذلك اليوم من اسعد ايام حياتي حيث شعرت مع هذه الفتاة انني املك الدنيا وما عليها كانت في قمة الجمال والبراءه والصفاء ، كل هذا كان دافع لي لكي افكر في الارتباط بها من اول لحظة رأيتها.
نعم فكرت في الارتباط بها عند عودتي للمنزل وقبل ان انام وانا على فراشي وبعد التفكير في احداث هذا اليوم السعيد من عمري ، قلت في نفسي وقررت ان تكون هذه الفتاة زوجة لي في يوم من الايام.
وكانت هذه الليلة اجمل ليلة في حياتي حتى ذلك الوقت الذي استيقظت فيه بسرعه لأكون موجود امامها في الوقت المحدد بيننا في نفس المكان ، ذهبت مسرعاً إلى المكان ، عندما رأيتها احسست وكأن روحي كانت مسلوبه مني وقد عادت لي في هذه اللحظة.
بعد المصافحة بدأنا في استكمال الحديث الذي بديناه يوم امس ولكن هذه المرة تحدثنا عن عائلاتنا واخبرتني ان لديها اخت تكبرها بعام واحد واخ يصغرها بعامين وعلمت ان وضعها المادي قد يكون اعلى من وضعي بدرجات قليلة .. حدثتها عن ما فكرت فيه ليلة امس بعدما تركتها وكانت هذه الفتاة وبالفعل مخلوق عجيب جذاب لم يُخلق مثله على وجهه الارض ، صارحتها بأنها الفتاة الوحيدة التي حركت بداخلي كل المشاعر الرقيقة الصادقة ، بعكس كل العلاقات السابقة والتي كانت مليئة بالمصالح والاخطاء.
كنا نجلس على الشاطىء امام المياة مباشرة ، حتى نظرت لها وصارحتها بحبي لها ، وسرعان ما بدأت اشرح وافسر هذا الحب السريع.
كنت صادق في كل كلمة خرجت من قلبي إلى فمي ثم إليها ، قلبي الذي كان يتحدث إليها وكأنه كان يعرفها من زمان ، ربما من بداية وجودي في الدنيا وكأنني كنت انتظر ان اتقابل معها في يوم من الايام وها قد جاء اليوم الذي كنت انتظره ، جاء اليوم الذي وجدت فيه نصفي الآخر في هذه الدنيا المليئة بالبشر.
عبرت لها عن كل ما بداخلي والكثير والكثير حتى انها لم تعلق على اي شيء في هذه اللحظة ، وكان هذا بناء على طلبي حيث طلبت منها ان لا تقول اي شيء الا عندما تتأكد من مشاعرها تجاهي
ومر هذا اليوم بسرعة البرق وتقابلنا في اليوم الثالث وكانت اول كلمة تنطقها هي كلمة بحبك .. وكنت في قمة سعادتي وشعرت انني في هذه اللحظة فقط جئت إلى الدنيا لهذا السبب ( لاسمع هذه الكلمة ) ، بعدما كنت اتسائل عن سبب مجيئي لهذه الدنيا.
وبعد لحظات استعدت فيها عقلي .. قررت ان استفسر منها عن سبب حبها لي وشرحت لي بالتفصيل عن اعجابها بشخصيتي القوية واحلامي المستقبلية واهدافي وشجاعتي في مواجهتها بحبي لها.
منذ ذلك اليوم بدأنا نتحدث في الخطوات التي سأفعلها انا للوصول اليها ومن بداية سوء حظي عندما اخبرتني بأنها في الاساس تسكن في احدى البلدان التي تبعد عني اميالاً كثيرة ، ولم يقف سوء الحظ على ذلك بل علمت بأن والدها ووالدتها يريدون ان يزوجوها مبكراً بمجرد تخرجها ، مما يقطع علينا فرصة تكوين نفسي ومستقبلي.
كانت هذه اهم عقبتين تواجهنا ولكن سرعان ما وجدنا لهم حلول موضوعية ، فحبنا كلما كان قوي ، كلما كان قادر على التغلب على كل العقبات التي تواجهه مهما كانت.
تواعدنا انها ستبعد عن اهلها فكرة الزواج المبكر بحجه انها تريد ان تثبت نفسها اولاً في المجال الذي تحب العمل بها ، واثناء هذه الفترة سأقوم انا بالعمل في الكتابة والشعر ونشر المشاريع المستقبلية وتنفيذها ، حتى اكون جدير بالزواج منها.
اتفقنا على كل شيء ، حتى على ديكور المنزل الذي سنسكن به وكذلك عدد اطفالنا واسمائهم.
ومرت الايام وعادت إلى بلدها وكنا نتحدث بأستمرار عن طريق المراسلات او المكالمات التليفونية ، وفي احدى المرات وجدت اسلوبها وقد تغير بعض الشيء ، لم تكن على طبيعتها في ذلك اليوم ، وعندما سألتها ماذا بها ، اخبرتني بأنها اخبرت والدتها بأرتباطنا العاطفي وعن الخطوات التي سنسيرها للارتباط الفعلي امام كل الناس ، ولكن والدتها مانعت الفكرة بشدة وبدون اسباب ، وطلبت منها ان لاتتحدث معي مرة اخرى ، وكانت المرة الاولى التي اتعصب عليها وكدت ان اسب والدتها واهلها ولكني تمالكت اعصابي ، وسألتها عن ما اذا كانت تريد تنفيذ ما امرتها به والدتها ، واجابتني برغبتها في تنفيذ ذلك وقطع الاتصال معي بأي صورة.
كانت ثورة من الغضب بداخلي في هذه اللحظات ولكني وافقتها واحترمت رغبتها في تلبيه امر والدتها ، وبالفعل تم الانفاصل شهر تقريباً ، واثناء هذا الشهر كنت لا انام الليل او النهار ، وكنت لا أأكل سوى بعض الطعام بالغصب حيث لاحظ عليا كل من معي في المنزل حالتي في هذه الاثناء.
وبعد مرور شهر وجدت رسالة تصلني من احد صديقاتها المقربات منها تخبرني فيها بأن حبيبتي بخير وترسل لي السلام الملفوف بالاشواق والاماني والوعود بالاستمرار ، وبعدها بأقل من يوم واحد وجدتها هي تكلمني بنفسها وتخبرني عن ما فعلته طوال هذه المدة بدوني ،، ولا اخفي انني بكيت وانا اتحدث معها واردد لها كلماتي الرقيقة واخبرها ان الحياة ليس طعم بدونها ، والدنيا كالسجن من غيرها.
عدنا مرة اخرى للمراسلات والتحدث هاتفياً ولم اراها طوال هذه الفترة ، ولكنني كنت على يقين بأنها تحبني وانها مازالت على وعدها لي ، وكنت احتويها وتحتويني ، فلا يمر يوم بدون ان نتحدث ، لا افعل شيء الا بعد استشارتها ، ولا تذهب مكان او تتحدث إلى احد الا بعد أخذ موافقتي.
وكانت المفاجأة التي صعقتني عندما شاهدتها بعيني تحول مشاعرها وحبها نحو شخص آخر ، وذلك اثناء فترة غيابي عنها عدة ايام.
عندما عدت وجدت عدم اهتمام بي وكأني كنت لا شيء يذكر في حياتها ، بدأت اراقب تصرفاتها من خلال خط سيرها وجدتها تتحدث إلى احد الاشخاص بالساعات والساعات ، ليس ذلك فقط بل وانه كان بينهم عدة لقاءات.
ما كدت اصدق الموقف حتى صارحتها بما رأيتها منها وما كان منها سوى الاستنكار وتكذيبي ، وتكذيب حقائق رأيتها بعيني ، وهذا ما جعلني ادرك انها على علاقه ما بهذا الشخص ، ربما لا تكون علاقة حب ، ربما يكون استلطاف او ارتياح معه ، وكان ردي عليها هو التعصب والغضب عليها وتركها لحالها وعدم الاتصال بها لفترة تزيد عن الشهر.
واثناء هذه الفترة كنت اتألم ليلاً ونهاراً ، ولم انجز اي شيء في عملي او كتاباتي ، وبدأت حالتي الصحية والبدنية تتدهور ، كان قلبي يقول لي في كل لحظة انها مازالت تحبك وإن مثل هذا الخطأ ربما حدث لبعدي عنها بعض الوقت ، وايضاً اعترف بأني اعطيت للموضوع اكتر من حجمه وكان لابد ان يعالج بحكمة عن ذلك ولكنها ساعة الغضب تكون فيه العين محجوبة عن الصواب ، ولكن عقلي كان يرد على قلبي ليقول ان مجرد تنكرها من الخطأ الذي ارتكتبتها هو في حد ذاته جريمة اخرى.
حتى قررت أخطر قرار في حياتي وهو ان اعود لها واسامحها وتسامحني وانسى كذبها وخداعها ولكني عدت بعدما تحول الحب الذي كنت اراه بداخلها ناحيتي إلى كره وعداء ، ورغبة منها في ان يكون هذا الشخص ( الذي اعجبت به ) افضل مني في كل شيء لكي تعطيني درس لن انساه ، نعم هذا ما رأيته امام عيني واثبتته تصرفاتها بعد عودتي لها.
من ثاني يوم بدأت تعود للتصرفات التي كانت تفعلها وتغضبني ، وتتحدث وتخرج مع اكبر عدد من الذين ارى اراهم غير صالحين لصداقتها ، ولكنها كانت تعاندني وكأنها كانت تظن اني عدت إليها راضياً بالامر الواقع التي صنعته هي ، بل وانها وصلت بها الامر بأن تصفني بالمريض النفسي .. اعترف انني السبب لعدم قدرتي على الثبات امامها.
وبهذا وجدت امام عيني الحب الاول والوحيد في حياتي يتحول إلى كتله من النار ليعذبني طوال ايامي القادمة.
وكنا على هذا الحال كثيراً ، اكلمها اليوم واترجاها بأن تظل جنبي وان تنفذ معي الاحلام التي حلمناها سوياً على الشاطىء ، ولكن لم اجد اي رد على كلامي هذا سوى تعمد عدم الاهتمام.
انني سقطت من نظرها وإلى الابد ..
ولكني وبعد كل ما فعلته معي اعترف بأنني لن احافظ عليها ، تصرفاتي كانت سبب قوي في بعدها ، ومهما حدث منها لا استطيع ان اكرهها ، لانها كانت ومازالت جزء من تكوين قلبي وعقلي.
تمر الايام وتمر الايام حتى اعلم انها قد تم عقد قرانها على احد الاشخاص واصبحت زوجة له ، لم يكن هذا الشخص الذي فضلته عني في يوم من الايام ، بل كان شخص آخر رجل مجتمع ناجح في مجاله.
عندما علمت بأنها تزوجت بين يوم وليله ، لم اتمالك نفسي بل ولم اتمالك اي شيء آخر وسقطت ارضاً في التو ولم استيقظ الا داخل احدى الغرف بالعيادات الخاصة وبجاني افراد عائلتي التي نسيتها في يوم من اجل حب هذه الفتاة الجميلة.
انها كانت تستحق الكثير وكنت اريد ان املك الدنيا لأهديها لها ولكن ترتيبات القدر.
ترتيبات القدر ايضاً ارادت ان اكمل مسيرتي التي بدأتها في الكتابة وان تُنشر لي اعمال وادخل عالم التليفزيون وكتابة المسلسلات الاجتماعية وبعد اقل من 6 شهور من زواج الفتاة الجميلة ، اتخذت قراري ان افكر بعقلي لأعيش سُنّة الحياة وان ابدأ في تكوين اسرة اكون انا المسؤل عنها.
لم اغلب كثيراً ووجدتها امامي زوجتي التي كان من المفترض ان اعجب بها واحبها ، من اجل الاولاد والاسرة التي حلمت في يوم من الايام ان اكونها مع الفتاة الجميلة التي لم يحالفني القدر ان ارتبط بها.
احببت زوجتي التي ارتبط بها لكن ليس بدرجة حبي للفتاة الجميلة .. ولكنه كان حب كافي لكي تسير الحياة في طريقها الطبيعي.
وجاء يوم زواجي بعد عام ونصف من زواج الفتاة الجميلة ، التي كنت وما زالت احبها واعشقها اكثر من اي شيء في الدنيا ، بل وإن مقدار حبي لها لا يقارن بأي قصة حب سجلها التاريخ او لم يسجلها ،، او اي قصة حب اتت او لم تأتي بعد.
كنت اتابع اخبارها من بعيد ، لم تراني طوال فترة زواجها ، كنت اتطمأن عليها من بعيد ولم احاول ان اراها ً، لم اعرف هل تحب زوجها ام لأ ، لم يكن يهمني في شيء ، لكني الذي كنت على يقين به انه لم ولن يحبها احد في الدنيا بقدر حبي لها.
كنت طوال الوقت اسأل القدر . لماذا لم تعطيني الفرصة لأعود واراجع نفسي ؟ ولماذا هي لم تسمح لي بتصحيح هذه الصورة الضعيفة التي اخذتها عني ؟
احاول ان اجد لنفسي مبرر ، فاحياناً اقول لنفسي أنه كان اول واصدق حب في حياتي ، وكانت تجربة لم اعيشها من قبل مثلها مثل اي تجربه اولى معرضه للوقوع في اخطاء.
ها هي الفتاة الجميلة تنجب من زوجها الطفلة الجميلة التي حلمت بها في البداية معي.
انا ايضاً زوجتي تنجب طفلة جميلة لاسميها على اسم حبيبة قلبي الفتاة الجميلة ، انظر اليها طوال الوقت اعطيها كل المشاعر الجميلة التي كنت احلم ان اعطيها للفتاة الجميلة صاحبة الاسم الاصلي.
بعدها قررت الا احاول معرفة اي شيء عن الفتاة الجميلة والتي اصبحت اعلامية مشهورة وزوجة لرجل مجتمع. ولكن نجاحها في مجالها القريب إلى مجالي كان يجبرني على معرفة اخبارها أول بأول.
لم احاول الاتصال بها او التقرب منها ، لا اعرف هل مازالت تتذكرني ام لأ ؟ اعتقد انها لا تذكرني الآن ، بل اعتقد انها لا تذكرني منذ زمن فات ، منذ ان فشلت في الحفاظ على حبها لي.
توفت زوجتي وكنت انا قد تجاوزت العقد السادس من عمري ، بعدها قررت اعتزال الكتابة وقضاء ما تبقى من عمري في شقتي الساحلية والتي تطل على نفس الشاطىء الذي شهد اول لقائي بالفتاة الجميلة منذ زمن فات ، اعيش ايامي الاخيرة امام شاطىء الذكريات ، لأتخيل مسلسل حياتي من بدايته حتى هذه اللحظات الاخيرة ، واتذكر ايام شبابي وكل الذكريات واللحظات السعيدة التي عشتها في حب الفتاة الجميلة ، انني مازلت اعيش هذه اللحظات السعيدة حتى النفس الاخير في قلبي الذي ظل طوال الوقت ينبض لأجلها ، رغم كل هذه السنوات فهي اجمل ما رأت العين.
كم اتمنى ان يعود بي شريط مسلسل الحياة من جديد ، لأجدها بين يدي على هذا الشاطىء .. واخوض تجربة الحب الاول من جديد وبدون اخطاء وسأحافظ عليها بين ضلوعي ولن ادعها تذهب .. ولكن هذه الامنية باتت من المستحيل ان تتحقق ..
املي الكبير ان يجمعني الله بها بعد وفاتي

تمت

خالص تحياتي

سمسم

مضطر اغيب عنكم شوية واعتبروها اجازة وضع

2007-04-20T12:20:00.000-07:00

السلام عليكم عالجميع
في الحقيقة انا مُحرج من القراء والجماهير العريقة اللي استقبلت المدونة بتاعتي بترحاب شديد
ولكني مضطر اغيب عنكم شوية واعتبروها اجازة وضع :d
عارف انه ميصحش آخد اجازة في وقت قصير - اسبوعين .. عمري التدويني
ولكن اعذروني مش بأيدي ومش عاوز اكون دمي تقيل .. إن شاء الله هرجعلكم قريباً بأخبار حلوة

واسيبكم مع بعض من صوري المُفضلة

:$ دي صورة حرباية او حية ( مش عارف ) .. المهم انها عالرغم من لدغدتها الميمتة الا اني بحبها قوي

ودي صورة شمس منورة زي مانتو شايفين

ضوء القمر

طفلة فلسطينية .. الله يكون في عونكم

كأس العالم .. اوعدنا يارب

الوسادة الخالية 2007

انا .. بقولكم هتوحشوني
صورة مبعوتالي لسه ما سألتش صاحبتها عن معنى الصورة

الله يرحمة

خالص تحياتي : سمسم

ملوك وطوائف

2007-04-13T05:32:00.000-07:00

طبيعة الكووووووون

بتقول ان لازم المواطن يتعاون مع المخبر ويصاحب الحرامي

عشان الحياة تمشي

طبيعة الكووووون

بتقول ان لازم الذكي يصاحب الغبي ويتعايش معاه في الدنيا

عشان الحياة تمشي

طبيعة الكووووون

بتقول ان الكويس لازم يتعامل مع الوحش ويتعلم منه ويعلمه

عشان الحياة تمشي

اصبحنا ملوك وطوائف عديدة

كل واحد عاوز يبقى كبير .. على شوية جهلاء

اصبح الملوك >> ضعفاء

والطوائف >> جهلاء

على هذا الحال

لن يأتي يوم على الملوك لتكون فيه اقوياء

كذلك لن يأتي اليوم لنرى هؤلاء الطوائف عقلاء

لذلك قررت

انني لن اكون من الملوك

ولا حتى من الطوائف

انها مملكتي الخاصة

انا الحاكم فيها وانا المحكوم

انا الكبير فيها وانا الصغير

انا الناجح فيها وانا الفاشل

انا العاقل وانا والمجنون

انا الحبيب وانا المحبوب

واترككم انتم ايها الملوك مع طوائفكم العديدة

وسوف نلتقي قريباً على اي مائدة وسنرى ماذا انجزتم جميعكم

وماذا انجزت

كنت اتمنى ان اعيش معكم طبقاً لطبيعة وقواعد الكون

ولكن انتم ايها الملوك اخترتم ان تكون ملوك ضعفاء على هؤلاء الطوائف الجهلاء

التاريخ يذكر ان مثل هذه الممالك لن تستمر كثيراً .. وسيأتي عليها اليوم لتُهدم .. وتُنسى

نلتقي بعد الفاصل الاعلاني هذا

http://video.google.com/videoplay?docid=-7628883180110470615

سنعووووووووود

خالص تحياتي : سمسم

احم احم .. حاجات عاوز اوضحها أولاً ( قبل ان أدّون ) سمسم

2007-04-06T20:07:00.000-07:00

احم احم
اول حاجه احب اوضحها قبل ان أدّون - هي كلمة احم احم
جات منين وراحت فين وبكتبها ليه
انا نفسي لحد دلوقتي مش عارف .. يمكن عشان كنت بسمع الناس الكبيرة عندنا في العيلة كانت قبل ما تدخل اي بيت تقول : احم احم .. يارب يا ساتر
والسبب طبعاً زي ماهو واضح ممكن ست البيت يكون شعرها عريان ولا بتاع
العيال حد قالع بنطلونه او بيشم ف رجل اخوه - بتحصل برضو :)
ف احنا نقول احم احم بصوت عالي .. ويارب يا ساتر ، ونقوم داخلين المكان واحنا ونصيبنا بقى ( لقطنا شعراية عريانه .. بنطلون مقلوع - لا مؤاخذه يعني - خليك مُحترم يا سمسم ف اول تدوينه عشان محدش يفهم غلط - انزل بالايقاع يا مشمش
في البداية احب اشكر صديقي العزيز محمود صابر
صاحب الاسم الحركي : حرنكش
صاحب مدونة : شبشب بصباع
صاحب كل دول ؟ اللهم لا حسد يا حرنكش
احب اشكرك يا معللم حرنكش انك قمت بمهمة عمل المدونه دي من حوالي 7 / 8 شهور
طبعاً انا كنت مطنش ومكنتش احسب ان ليا جماهيري العريقة اللي تحب تسمع خطبة ولو اول كل شهر مرة
:d
انت نفسك ممكن تستغرب اما تقرى المدونة بتاعتي وتلاقيها عَمرت بالكلام
مش بعيد تقولي .. جبت وقت منين وعمال تقولي مشغول مشغول .. طاب يعني ما تخليك معانا ف ون شوت الموقع لسه مبتدأ واشتغل مش هياخد منك 10 دقايق كل يوم
وفرت عليك يا عم الكلام اهو :d
يااااااااااااااااااساتر
كل ده شكر لحرنكش ليه يعني .. رئيس الجمهورية ده يا اخواتي ( جمهورية التشيك ، مش مصر يا اخوانا / معنديش استعداد اتسجن دلوقتي ) ... بمناسبة رئيس الجمهورية ودور مصر في المنطقة العربية
:)
عاجباني قوي كلمات بسمعها ف الاخبار بتاعتنا المصرية
نشرة 6 ونشرة 9 دي
اما الاقي الفلسطينين عمالين بيدبح فيهم وعايشين حرب ومآساه .. ويطلع اي حد فيهم قدام الكاميرا بيبدأ كلامه بأنه بيشيد بدور مصر في المنطقة
طاب ياعم انت ف ايه ولا ف ايه مش عارف انا
الله يمسيك بالخير يا احمد يا قريع - كان دايماً بيشيد بدور مصر لدرجة اني فكرت ان اسرائيل بتعاند معاهم وتعمل عمايلها دي بسبب الاشادة بدور مصر :)
ده على اعتبار يعني ان مصر واسرائيل كان بينهم حرب من كام سنة
بس دلوقتي الحمد لله .. ربنا يخليلنا التطبيع .. ماله التطبيع ؟ مش وحش التطبيع ماحنا بناكل ونشرب وعايشين عيشه فل
نرجع لحرنكش ؟
لالا استنى عاوز اقول كلمة لاسماعيل هنية رئيس الحكومة الفلسطينية
يا سُمعه - اسمك على اسم بابا على فكرة - يا ابو السباع حاول تشيد بدور اسرائيل ف المنطقة يمكن يسمعوك وقلبهم يحن ويدوك الارض
شكرنا حرنكش والحمد لله - آه على فكرة الشكر ده مش ببلاش يا معللم انا طمعان ف كام حاجه ف البلوج كده عشان يعجب الزوار وانت عارفني بحب اريح المُشاهد عالآخر
-----------------------------------
نيجي لتاني نقطة
ليه sas2ss ?
انا عن نفسي ما اعرفش الاسم ساس 2 اس اس ده sas2ss
حكايته ايه ؟
تقريباً اما دخلت نت من كام سنة كان النت غالي قوي
الساعة كانت ب 10 جنيه
وكنا قاعدين انا واصحابي وكل واحد بيعمله ايميل وجه الدور عليا
قالولي عاوز تكتب ايميلك ايه
يلا بسرعه مفيش وقت الساعة ب 10 جنية والحسابه بتحسب
لقيت صوابعي لعبت عالكيبورد وكتبت الكلمة دي
sas2ss
ومن ساعتها وبقى ده ايميلي عالياهو والهوت والمكتوب وكل الحاجات الحلوة دي
بس اللي عاوز يراسلني عالجي ميل يضيف 2
sas22ss
عشان واضح ان فيه سمسم قبلي سبقني
---------
وضحنا احم احم
ووضحنا ساس 2 اس اس
اسيبكم بقى واروح اكمل فيلم طائر الليل الحزين
لاني حاسس ان عادل ادهم هيعملها ويطلع خاين زي كل مرة

يلا صباحكم فل ونلتقي في الحلقة القادمة .. اوعدكم مش هغيب عن اسبوع

آه صحيح .. اصدقائي السينمائيين .. استنو شوية المواضيع الفنية جاية وارجوكم محدش يغير المحطة

نلتقي بعد الفاصل
:)
sas2ss@yahoo.com

خالص تحياتي : سمسم